Nyimbo 96 - Bhukhu la Kuyamba

Mulungu mambo wadziko lentse

¹ Imbilani Chawuta nyimbo inyowani! Imbilani Chawuta, dziko lentse lapantsi!

² Imbilani Chawuta, dalisani dzina lake! Lalikilani chipulumuso chake ntsiku nantsiku!

³ Lalikilani mbili yake kumadziko yentse! Bzidabwiso bzake kwawanthu wentse!

⁴ Pakuti Chawuta ninkulu, anfunika kudumbiziwa kwene-kwene, anfunika kugopewa kuposa amilungu wentse.

⁵ Pakuti amilungu wentse wawanthu nibzifanikizo bzapezi-pezi, koma Chawuta adalenga kudzulu.

⁶ Ukulu nandemela bzili pamaso pake, mphamvu nakukoma bzili mumbuto yake yakuyela.

⁷ Pelekani kwa Chawuta, madzinza yentse yawanthu! Pelekani kwa Chawuta mbili namphamvu!

⁸ Pelekani kwa Chawuta mbili yadzina lake, takulani mpfupo mubwelese kubzintalo bzake!

⁹ Kotamilani Chawuta mundemela yakuyela! Tetemelani pamaso pake, dziko lentse!

¹⁰ Lewani kumadziko yentse kuti, “Chawuta antonga! Yinde, dziko lakhazikisiwa, lin'zatekenyeka lini; an'zatonga wanthu mwakulinganiza.”

¹¹ Lekani kudzulu kukondwe, dziko lisekelele! Nyanja nabzentse bzili m'mwemo bziwunge!

¹² Lekani mathengo nabzentse bzili m'mwemo bzisekelele! Pamwepo miti yentse yan'thengo in'zayimba nakukondwa,

¹³ pamaso pa Chawuta pakuti am'bwela, am'bwela kuzatonga dziko. An'zatonga dziko mwakulungama, wanthu nakukhulupilika kwake.