Nyimbo 94 - Bhukhu la Kuyamba

Mulungu ntongi wawentse

¹ Imwe Chawuta, Mulungu wakubwezela, imwe Mulungu wakubwezela ng'ayimani!

² Bzisumuseni, imwe ntongi wapantsi! Pagalani wakubzikuza!

³ Kufika lini wakuyipa, imwe Chawuta? Kufika lini wakuyipa achibzikuza?

⁴ An'thulula mafala yawo yakubzikuza, wentse an'chita bzakuyipa antumbama.

⁵ Am'phwanya wanthu wanu, imwe Chawuta aniwawisa nthaka yanu.

⁶ Anipha adziche naanyakubwela, aniswa nkhungwa,

⁷ achimbati, “Chawuta aniwona lini, Mulungu wa Jakobho an'dziwisisa lini.”

⁸ Dziwisisani, imwe wanthu wakupusa! Malombe, muzabvesesese lini?

⁹ Ko iye adabzala makutu, angabve lini? Ko iye adakonza maso, angawone lini?

¹⁰ Iye anilanga madziko, angatsimule lini? Iye anfundisa wanthu kudziwa,

¹¹ Chawuta an'dziwa nkhumbukila zamunthu, kuti n'zapezi.

¹² Niwakudala munthu wamunilanga, imwe chawuta, nawuyo wamunfundisa mafundiso yanu,

¹³ kumpasa mpumulo muntsiku yakushupika, kufikila dindi lachelelewa wakuyipa.

¹⁴ Pakuti Chawuta ansiya lini wanthu wake, antaya lini nthaka yake.

¹⁵ Pakuti kulinganiza kun'zabwelela kwawakulungama, wentse wakukonkholoka ntima an'zakuteyela.

¹⁶ Mbani angandisumukile kunyanganana nawanthu wakuyipa? Mbani angandiyimilile kunyanganana nawanthu an'chita bzakuyipa?

¹⁷ Ninga Chawuta akhali lini n'thandizi wangu, moyo wangu ukhadakulumiza kuyenda kakhala kudziko lakunyamala.

¹⁸ Pandidakumbuka kuti, nzayo zangu zaakutelela, ntsisi zanu, imwe Chawuta zidanditsigila.

¹⁹ Nkhumbukila zakuyipa zikawanda muntima mwangu, kunyamaliza kwanu kunkondwelesa moyo wangu.

²⁰ Ko atongi wakuyipa angalinganiziwe nayimwe? Aniyikha chakuyipa kuti chikhale lango?

²¹ Ankochezana pabodzi adanyanganana nawumoyo wawakulungama, achipasa mulandu gazi lamunthu alibe mulandu.

²² Koma Chawuta wakhala mbuto yangu yakubisala, Mulungu wangu mwala wangu wakupotela.

²³ An'zaabwezela kuyipa bzawo, an'zaamala nathangwe labzakuyipa bzawo, Chawuta Mulungu wathu an'zaamala.