Nyimbo 92 - Bhukhu la Kuyamba

Nyimbo yakupembeza

Nyimbo. Chimbo cha Sabata.

¹ Bzili bwino kutenda Chawuta, kuyimba nyimbo zakudumbiza dzina lanu, imwe Nyakudzulu-dzulu,

² kulalikila ntsisi zanu machibese, nakukhulupilika kwanu usiku,

³ ndichiyimba nantolilo nabhanjo, nakulila kwachipendani.

⁴ Pakuti, imwe Chawuta mudachita kuti ndikondwe nabasa lanu, pamabasa yamanja yanu niniyimba ndichikondwa.

⁵ Nkukula lini kudachita mabasa yanu, imwe Chawuta! Nkhumbukila zanu n'zakunoka kwene-kwene.

⁶ Wakupusa angabzidziwe lini bzimwebzo, lombe lingabzibvesese lini ibzi,

⁷ kuti ne wakuyipa amele ninga upsa, ne wentse wakuchita bzakuyipa atambalale. Adanyanganana nakuchenekelewatu.

⁸ Koma imwe Chawuta, muli padzulu kufika lini nalini.

⁹ Pakuti wonani azondi wanu, imwe Chawuta, wonani azondi wanu an'zamala; wentse an'chita bzakuyipa an'zamwaziwa.

¹⁰ Koma imwe mudakuza nyanga yangu ninga yanyati, mudandidzodza mafuta manyowani.

¹¹ Maso yangu yawona kugwa kwaazondi wangu, makutu yangu yabva kuchenekeka kwawan'chita bzakuyipa.

¹² Wakulungama antambalala ninga muti wan'chewu, achikula ninga muti wamusidhari waku Lebhanoni.

¹³ Adabzaliwa munyumba ya Chawuta, antambalala mubzintalo bza Mulungu wathu.

¹⁴ Ne muwunkhalamba am'bala michelo, an'khala awisi, adapsipila,

¹⁵ kulalikila kuti Chawuta niwakukonkholoka, ndiye mwala wangu, mwayiye mulibe chakuyipa.