Nyimbo 91 - Bhukhu la Kuyamba

Mulungu nyakutichinjiliza

¹ Uyo an'khala munyumba ya Nyakudzulu-dzulu, an'khala mun'thunzi wa Nyamphamvu zentse.

² An'zati kwa Chawuta, “Pakuthawila pangu napakuchinjilizika pangu, Mulungu wangu wanin'themba.”

³ Pakuti an'zakupulumusa kumulapu wanyakuwuteya, nanyathwa.

⁴ An'zakugwanla namaphaphilo yake, pantsi pamaphaphilo yake un'zawona pakubisala, kukhulupilika kwake ninchinjilizo nampanda.

⁵ Un'zabva lini mantha nakugopsa kwawusiku, panango nsewe unthusiwa masikati,

⁶ panango nyathwa infamba mun'dima, panango bzin'cheneka bzamasikati.

⁷ Sawuzande yawanthu ingagwe mbali yako, masawuzande khumi kujanja lako ladidi, koma palibe chinfika pafupi nayiwe.

⁸ Iwe un'zanyangana namaso basi, uchizawona kubwezelewa kwakuyipa.

⁹ Pakuti udachita Chawuta pakuchinjilizika pako, Nyakudzulu-dzulu pakukhala pako.

¹⁰ Palibe chakuyipa chin'zakugwela, palibe ngozi in'zafika pafupi natenti yako.

¹¹ Pakuti an'zawuza ngilozi, zikuchengete munjila zako zentse.

¹² An'zakutakula m'manja mwawo, kuti nzayo yako ileke kukhukhumudwa namwala.

¹³ Un'zaponda mphondolo nachipapasha, mwana wamphondolo nanyoka, un'zabziponda nanzayo.

¹⁴ “Pakuti wamamatila payine, nin'zamupulumusa, nin'zamuchinjiliza, thangwe lakuti an'dziwa dzina langu.

¹⁵ Paan'chemela kwayine, nin'zamudayila, nin'zakhala naye mukushupika, nin'zamupulumusa ndichimulemekeza.

¹⁶ Nin'zamukhutisa nawumoyo utali, nin'zamuwonesa chipulumuso changu.”