Nyimbo 90 - Bhukhu la Kuyamba

Pemphelo la Mozisi munthu wa Mulungu

Pemphelo la Mozisi, munthu wa Mulungu.

¹ Mfumu, mwakhala muli mbuto yathu yakubisala, mumibadwe yentse.

² Mapili yanati yabadwa, ne mukanati mwalenga dziko napantsi pentse, kuchoka lini nalini kufika lini nalini, ndimwe Mulungu!

³ Mum'bweza munthu kudongo, muniti, “Bwelelani imwe wana wamunthu.”

⁴ Pakuti magole sawuzande m'maso mwanu, yaninga dzulo payimpita, panango ninga chipindi chibodzi chakukhaliliza usiku.

⁵ Munkukula wanthu muchiyenda nawo; aninga maloto, ninga upsa um'mela machibese,

⁶ machibese umpsipila bwino, uchimela, mawulo unfota uchiwuma.

⁷ Pakuti tamaliwa nawukali wanu, nankwiyo wanu tin'gopsewa kwene-kwene.

⁸ Imwe mwayikha bzakuyipa bzathu pamaso panu, kutaza kwathu kwakabisila munkuyikha pakuwinika kwankhope yanu.

⁹ Ntsiku zathu zentse zimpita munkwiyo wanu, magole yathu yam'mala ninga mwawu.

¹⁰ Magole yawumoyo wathu nimagole makumi manomwe, wakulimbawo nimagole makumi masele basi yakulalama; koma nthawe yakulalama kwawo, nkushupika nanthamu zokha-zokha; inkulumiza kumala, pamwepo tim'mbuluka kuyenda.

¹¹ Mbani an'dziwa kukula kwawukali wanu, nankwiyo wanu kuteyeza kugopsa kwanu?

¹² Nakutenepo tifundiseni kuwelenga ntsiku zathu, kuti tikhale nantima wanzelu.

¹³ Bwelelani imwe Chawuta! Kufika lini? Bvelani chifundo alanda wanu!

¹⁴ Tikhutiseni machibese nantsisi zanu, kuti tisekelele nakukondwa ntsiku zathu zentse.

¹⁵ Chitani kuti tikondwe kuteyeza ntsiku zizinji ninga zamudatidzudza, pomwe ninga magole mazinji yatidawona bzakuyipa.

¹⁶ Lekani basa lanu liwoneke kwaalanda wanu! Nandemela kwawana wawo.

¹⁷ Lekani chifundo cha Mfumu Mulungu wathu chikhale payise! Mukhazikise mabasa yamanja yathu kwayise, yinde, khazikisani mabasa yamanja yathu.