Nyimbo 9 - Bhukhu la Kuyamba

Kwanyakuyimbisa pa Mutilabheni. Nyimbo ya Dhaveti

¹ Ninkutendani Chawuta nantima wangu wentse, nin'zalewa bzamabasa yanu yan'dabwisa.

² Nin'zakondwa ndichisekelela kwene-kwene mwayimwe, nin'zayimba ndichidumbiza dzina lanu imwe Nyakudzulu-dzulu.

³ Azondi wangu paadachungunuka kubwelela, adadzedzeleka achichenekeka pamaso panu.

⁴ Mwachita kuti ndikhale nakulinganiziwa, imwe muli pampando muchipeleka kutonga kwakulungama.

⁵ Imwe mudatsimula madziko, imwe mudacheneka wakuyipa, mudathimilatu madzina yawo kufika lini nalini.

⁶ N'zondi wapululuka m'mathele yansaya kumala, maguta yawo yazuliwa, kudziwika kwawo kwamala.

⁷ Koma Chawuta an'khala pampando wake kufika lini nalini, wakhazikisa mpando wake wakutonga.

⁸ Antonga pantsi pentse mwakulungama, antonga madziko mwakulinganiza.

⁹ Chawuta an'zakhala wakuchinjiliza wakupondelelewa, nimbuto yakuthawila panthawe yakushupika.

¹⁰ Wentse an'dziwa dzina lanu an'zathemba imwe, pakuti imwe Chawuta muntaya lini munthu ankupsagani.

¹¹ Imbani muchidumbiza Chawuta an'khala mu Ziyoni, mudziwisembo pomwe wanthu mabasa yake!

¹² Pakuti imwe nyakubwezela gazi muniwakumbuka, muniyebwa lini kulila kwawakushupika.

¹³ Chawuta ndikomeleni ntima, nyanganani kudzudzika kwangu thangwe laazondi wangu! Imwe munin'chiza kuchoka pamisuwo yayimpfa,

¹⁴ kuti ndikawilikize mbili yanu pamisuwo yamwana wachitsikana wa Ziyoni, pamisuwo yamwana n'tsikana wamu Ziyoni, ninsekelela muchipulumuso chanu.

¹⁵ Madziko yadagwela m'madindi yaadabzichelela, mukombe waadateya minyendo yawo wokha idaphatiwa.

¹⁶ Chawuta adabziwonesa, watonga, wacheneka wakuyipa namabasa yamanja yawo. Higayiyoni. Selah.

¹⁷ Wakuyipa an'zabwelela kumbuto yawanthu wakufa, madziko yentse yanilamba Mulungu.

¹⁸ Pakuti wakusaya an'zaataya lini nthawe zentse, kunyanganila kwawakushupika kun'zamalilatu lini.

¹⁹ Sumukani Chawuta! Lekani kuti munthu akunde! Mishowo yawanthu wakuyipa ilangiwe pamaso panu.

²⁰ Agopseni Chawuta! Chitani kuti madziko yadziwe kuti niwanthu basi!