Nyimbo 88 - Bhukhu la Kuyamba

Chmbo. Nyimbo yawana wa Kora. Kwanyakuyimbisa kuteyeza Mahalati Leyanoti. Masikili ya Hemani mu Ezirahi.

¹ Imwe Chawuta, Mulungu wachipulumuso changu, ninilila masikati! Usiku ninilila pamaso panu.

² Lekani pemphelo langu libwele pamaso panu! Teyani khutu kukulila kwangu!

³ Pakuti moyo wangu wakhuta nanthamu, umoyo wangu uli ukufendela kumbuto yawanthu wakufa.

⁴ Nin'nyanganiwa pabodzi naawo akuyenda kudindi, ndili ninga munthu alibe mphamvu.

⁵ Ninga munthu watayiwa pakati pawanthu wakufa, ninga munthu adagona m'manda. Uyo wamunsaya kukumbukila pomwe, pakuti adachosewa m'manja mwanu.

⁶ Imwe mwandiyikha pantsi-pantsi padindi, kumbuto zan'dima zakunoka.

⁷ Ukali wanu wanditsamila, mwandigwanila namabimbi yanu yentse. Selah.

⁸ Mwachita kuti anzangu anditalamuke, mwandichita kuti ndikhale chinthu chin'nyantsa kwayiwo. Ndafungiliwa bzakuti nim'phsukunyuka lini.

⁹ Diso langu lachita khungu nathangwe lakushupika, ntsiku yentse nin'chemela kwayimwe Chawuta; nin'thamula manja yangu kwayimwe.

¹⁰ Ko mun'chita bzin'dabwisa kwawanthu wakufa? Ko chibvuli-bvuli chinilamuka kuzakudumbizani? Selah.

¹¹ Ko ntsisi zanu zingalewedwe m'manda? Panango chikhulupililo chanu mu Abhadhoni?

¹² Ko bzidabwiso bzanu bzin'dziwika kun'dima? Panango chilungamo chanu mumbuto yakuyebwa?

¹³ Koma ine, imwe Chawuta ninilila kwayimwe! Machibese pemphelo langu lin'gumana nayimwe.

¹⁴ Imwe Chawuta, ko mwanditayilanyi? Thangwe lanyi kubisa nkhope yanu kwayine?

¹⁵ Ndashupika, ndafika pafupi nayimpfa kuyambila pawubwana wangu, ndazungayila nakugopsa kwanu, ndasaya bzakuchita.

¹⁶ Ukali wanu wandigwanila, kugopsa kwanu kunin'cheneka.

¹⁷ Anin'zungunuka ninga madzi ntsiku yentse, yachindifungila mbali zentse.

¹⁸ Mwachita kuti aninfuna nashamwali anditalamuke, anzangu nimun'dima.