Nyimbo 86 - Bhukhu la Kuyamba

Pemphelo lakukumbila thandizo

Pemphelo la Dhaveti.

¹ Teyani khutu lanu, imwe Chawuta mundidayile! Pakuti ndine mphayi, palibe chandinacho.

² Ndifuweni, pakuti ndine wantsisi! Chizani mulanda wanu, uyo an'themba mwayine! Imwe ndimwe Mulungu wangu.

³ Ndichitileni chifundo, imwe Mfumu! Pakuti kwayimwe nin'chemelela ntsiku yentse!

⁴ Kondwesani n'zimu wamulanda wanu! Pakuti kwayimwe, imwe Mfumu ninsumusa moyo wangu!

⁵ Pakuti, imwe Mfumu ndimwe wabwino, wakulekelela! Mudadzala nantsisi kwaawo wentse an'chemelela kwayimwe!

⁶ Tetekelani, imwe Chawuta kupemphelo langu! Ikhilani nzelu kulila kwakukumbila kwangu!

⁷ Pantsiku yangu yakushupika nin'chemela kwayimwe! Pakuti imwe munin'dayila!

⁸ Palibe aninga imwe pakati paamilungu, Imwe Mfumu! Panango pana mabasa ninga yanu.

⁹ Madziko yentse yamudalenga yan'zabwela, kuzakotama pamaso panu, imwe Mfumu, yachizalemekeza dzina lanu.

¹⁰ Pakuti ndimwe nkulu, pomwe mun'chita bzidabwiso, imwe mwekha ndimwe Mulungu!

¹¹ Ndifundiseni njila yanu, imwe Chawuta! Kuti ndifambe mukukhulupilika kwanu; chitani kuti ndikhale nantima ubodzi wakugopa dzina lanu!

¹² Ninkudumbizani, imwe Mfumu Mulungu wangu, nantima wangu wentse! Nin'zalemekeza dzina lanu kufika lini nalini.

¹³ Pakuti ntsisi zanu kwayine n'zikulu kwene-kwene, mudapulumusa umoyo wangu kuchoka pantsi, pambuto yawanthu wakufa.

¹⁴ Imwe Mulungu, wanthu wakubzikuza andimukila! Chipani chawanthu wadima akupsaga umoyo wangu, ankuyikhani lini pamaso pawo.

¹⁵ Koma imwe, imwe Mfumu, ndimwe Mulungu wachifundo, nawakukoma ntima, munkulumiza lini kukalipa, pomwe mudadzala nantsisi nachikhulupililo.

¹⁶ Chewukilani kwayine mundibvele chifundo, pasani mphamvu kwamulanda wanu, chizani mwana wamulandakazi wanu.

¹⁷ Ndiwoneseni chilatizo chawubwino wanu! Kuti awo anin'zonda awone, anyazisiwe, pakuti imwe Chawuta, mwandithandiza nakundinyamaliza.