Nyimbo 85 - Bhukhu la Kuyamba

Kupemphelela dziko kuti likhale bwino

Kwanyakuyimbisa. Nyimbo yawana wa Kora.

¹ Chawuta mudakomedwa nadziko lanu, mudabweza Jakobho kuchoka kuwulanda.

² Mudalekelela bzakuyipa bzawanthu wanu, mudayebwa kutaza kwawo kwentse. Selah.

³ Mudabweza ukali wanu wentse, mudabzibweza pawukali wanu wakutentha.

⁴ Tibwezeni pomwe, imwe Mulungu wachipulumuso chathu! Chosani ukali wanu payise!

⁵ Ko mukhale mudatikalipila kufika lini nalini? Ko mupitilize ukali wanu kwamibadwe yentse?

⁶ Ko mutimusuluze lini pomwe, kuti wanthu wanu asekelele mwayimwe?

⁷ Tiwoneseni ntsisi zanu, imwe Chawuta, tipaseni chipulumuso chanu.

⁸ Lekani ndibve bzinilewedwa na Mulungu Chawuta! Pakuti an'zalewa bzankhalo kwawanthu wake, kwawantsisi wake, ngaaleke kubwelela kunjila zakupusa.

⁹ Chadidi chipulumuso chake chili pafupi naawo animugopa, kuti mbili ikhale mudziko lathu.

¹⁰ Ntsisi nakukhulupilika bzin'zagumana, chilungamo nankhalo bzin'zamphsodana.

¹¹ Chikhulupililo chin'zathubuka kuchoka pantsi, chilungamo chin'zanyangana pantsi kuchoka kudzulu.

¹² Yinde, Chawuta an'zapeleka bzabwino, dziko lathu lin'zapeleka mbewu.

¹³ Chilungamo chin'zayenda patsogolo pake, chichizakonzela njila makhalo yake.