Nyimbo 84 - Bhukhu la Kuyamba

Kusuwila nyumba ya Mulungu

Kwanyakuyimbisa: kuteyeza pa Gititi. Nyimbo yawana wa Kora.

¹ Nkukoma lini kumweko kwambuto yamun'khala, imwe Chawuta wawankhondo!

² N'zimu wangu unsuwa, yinde untopa bzintalo bza Chawuta. Ntima wangu nanyama yangu bziniyimba bzichikondwa, kwa Mulungu wamoyo.

³ Ne mbalami iniwonambo pakukhala, kalemwa-lemwa chisakila chakene m'mwemo, mwakam'balila wana wakene, pamaatali yanu yantsembe, imwe Chawuta wawankhondo, Mambo wangu, Mulungu wangu.

⁴ Niwakudala awo an'khala munyumba yanu, an'khala achikudumbizani! Selah.

⁵ Niwakudala munthu uyo mphamvu zake zili mwayimwe, uyo ntima wake una misewu iniyenda ku Ziyoni.

⁶ Paampita namuchigowa cha Bhaka, an'chichita ntsantsa, chichidalisiwa namvula yakuyamba ichidzadzambo namathawale.

⁷ An'thimiza kukhala namphamvu, an'zawoneka kwa Mulungu waamilungu mu Ziyoni.

⁸ Imwe Chawuta, Mulungu wawankhondo, ibvani pemphelo langu! Tetekelani, imwe Mulungu wa Jakobho! Selah.

⁹ Wonani nchinjilizo yathu, imwe Mulungu! Nyanganani nkhope yawakudzodzewa wanu!

¹⁰ Pakuti ntsiku ibodzi mubzintalo bzanu, niyabwino kuposa ntsiku sawuzande zakukhala kunango. Nkhasa bzangu kukhala nkhalilizi wapansuwo wanyumba ya Mulungu, pana kukhala m'matenti yawakuyipa.

¹¹ Pakuti Chawuta Mulungu nidzuwa nanchinjilizo, Chawuta ampasa kukoma ntima nambili; palibe chabwino chaan'nyima awo, anfamba mwakukonkholoka.

¹² Imwe Chawuta wawankhondo, ali bwino munthu an'themba mwayimwe!