Nyimbo 83 - Bhukhu la Kuyamba

Pemphelo la Izraeli lakukumbila kukunda azondi wawo

Chimbo. Nyimbo ya Asafi.

¹ Imwe Mulungu, lekani kunyamala! Lekani kukhala chete panango kutsetemala, imwe Mulungu!

² Wonani, azondi wanu ali kuchita chipilingu, azondi wanu asumusa misolo yawo.

³ Ampangana kuchita bzakuyipa kwawanthu wanu, aniwuzana kuchita bzakuyipa kwawanthu wanu wapantima.

⁴ Aniti, “Bwelani, lekani tiwamalize kuti aleke kuzawoneka ninga dziko; dzina la Izraeli lileke kuzakumbukiliwa pomwe!”

⁵ Yinde, ampangana nantima ubodzi, an'chita chibvano chakunyanganana nayimwe.

⁶ Matenti ya Edhomu, naa Ishimayeli, Moabhi, naa Hagari,

⁷ Gebhali, na Amoni, na Amaleki, Filisitiya pabodzi nawanthu an'khala mu Tire.

⁸ Pomwe Asiriya aphatana nawo, ndilo janja lamphamvu lawana wa Loti. Selah.

⁹ Chitani kwayiwo ninga bzamudachita kwaa Midhiyani, nakwa Sisera nakwa Jabhini pakankulo ka Kishoni,

¹⁰ wale adachenekewa pa Endori, achizakhala ndowe zapantsi.

¹¹ Chitani atsogoleli wawo ninga bzamudachita Orebhi na Zebhi, manduna yawo yentse ninga bzamudachita Zebha na Zalumuna.

¹² Awo adati, “Lekani tibzitolele mbuto zakudyesela za Mulungu.”

¹³ Imwe Mulungu wangu, achiteni ninga kabvuli-bvuli, ninga mungu kumphepo.

¹⁴ Ninga moto untentha thengo, ninga malilimi yamoto yan'gasa mapili,

¹⁵ nakutenepo ateyeleni nachonzi chanu, muwagopse nankhongolo yanu!

¹⁶ Dzadzani nkhope zawo namanyazi, kuti apsage dzina lanu, imwe Chawuta!

¹⁷ Ngaanyazisiwe anyale kufika lini nalini, ngaamale mwakunyazisiwa.

¹⁸ Ngaadziwe kuti imwe mwekha, uyo dzina lake ni Chawuta, ndimwe Nyakudzulu-dzulu padziko lentse lapantsi.