Nyimbo 81 - Bhukhu la Kuyamba

Nyimbo yapafeshita

Kwanyakuyimbisa kuteyeza pa Gititi. Nyimbo ya Asafi.

¹ Imbani, chemelelani kwa Mulungu, m'phamvu zathu! Kuwani, kondwani kwa Mulungu wa Jakobho!

² Tsamulani nyimbo, lizani chikhwechele! Lizani chipendani nabhanjo!

³ Lizani wunda pakukhala kwamwezi, pakukhuma kwamwezi, pantsiku yathu yafeshita.

⁴ Pakuti ichi n'chilango kwaa Izraeli, nintemo wa Mulungu wa Jakobho.

⁵ Adayikha umboni mwa Jozefi, paadazungila Ijipiti. Ndidabva fala landikhasaya kudziwa:

⁶ “Ndachosa ntolo paphewa lako, manja yako yatsudzuliwa kuchoka pantswanda.

⁷ Mukushupika udachemelela, pamwepo ine ndidakupulumusa, ndidakudayila nampheni, ndili mumbuto yakubisika, Ndidakuyesa pamadzi yaku Meribha. Selah.

⁸ Tetekelani imwe wanthu wangu, ninkuchenjezani! Iwe Izraeli ninga wanditetekelako!

⁹ Ngapaleke kukhala namulungu wachilendo pakati pako; leka kukotamila mulungu wakunja.

¹⁰ Ndine Chawuta, Mulungu wako, adakuchosa kudziko la Ijipiti. Yashama mulomo wako ndiwudzadze!

¹¹ Koma wanthu wangu antetekela lini fala langu, Izraeli ikhabzipeleka lini kwayine.

¹² Nakutenepo ndidaapeleka kumitima yawo yakuwuma, anfamba munzelu zawo.

¹³ Ninga wanthu wangu anditetekela! Ninga Izraeli anfamba munjila zangu!

¹⁴ Ndikhadakulumiza kukunda azondi wawo wentse! Ndichimenya azondi wawo najanja langu.

¹⁵ Awo an'zonda Chawuta, achitetemela patsogolo pake, tsoka lawo lin'zafika lini nalini.

¹⁶ Ndikhadakudyesa tiligu yabwino kwene-kwene, ndichikukhutisa nawuchi kuchoka mumwala.”