Nyimbo 80 - Bhukhu la Kuyamba

Pemphelo lakubwezelewa kwadziko

Kwanyakuyimbisa: kuteyeza Nyika. Umboni wa Asafi. Nyimbo.

¹ Tetekelani, imwe Nyakabusa wa Izraeli, imwe mun'tsogolela Jozefi ninga mabila! Imwe mun'khala pamakherubhi, ng'ayimani!

² Pamaso pa Efulemu na Bhenjemani na Manase! Bvundulani mphamvu zanu, bwelani muzatichize!

³ Imwe Mulungu, tibwezeni! Lekani nkhope yanu ing'ayime kuti tichiziwe!

⁴ Imwe Chawuta Mulungu wawankhondo! Kufika lini mudakalipa namapemphelo yawanthu wanu?

⁵ Imwe mudaadyesa chakudya chamisozi, mudaamwesa misozi achikhondwa.

⁶ Mudachita kuti tiwe chakulimbilana kwaanzathu, azondi wathu achimbaseka pakati pawo.

⁷ Imwe Mulungu wawankhondo, tibwezeni! Lekani nkhope yanu ing'ayime kuti tichiziwe!

⁸ Mudazula muvayini kuchoka ku Ijipiti, mudathamangisa wanthu wakunja, muchiwubzala.

⁹ Mudawuchenesela mbuto, uchizika mizi yawene bzakudzadza dziko.

¹⁰ Mapili yadagwaniliwa nan'thunzi yawene, misidhari ya Mulungu namithayi yayene;

¹¹ mithayi yeyene ichitambalala kufika kunyanja, namizi yayene kufika kukamadzi kakulu.

¹² Thangwe lanyi tsono mumphwanya mipanda yawene, bzakuti wentse ampita nanjila an'thedzula michelo yawene?

¹³ Nkhumba zan'thengo ziniwudya, pomwe, bzentse bzinfamba nathengo bziniwudya.

¹⁴ Imwe Mulungu wawankhondo, bwelelani! Nyanganani muli kudzulu, wonani! Nyanganani muvayini uwu;

¹⁵ kamuti kamudabzala najanja lanu ladidi, mwana wamudabzilimbisila mwekha!

¹⁶ Adawutentha namoto, achiwutema, nkhope yanu ngayiwatsimule, achenekeke!

¹⁷ Koma janja lanu ngaliwe pamunthu wajanja lanu ladidi, pamwana wamunthu wamudabzilimbisila mwekha.

¹⁸ Pamwepo tin'zakulinzani lini ngoto, tipaseni umoyo, ise tin'zachemela dzina lanu!

¹⁹ Imwe Chawuta Mulungu wawankhondo, tibwezeni! Lekani nkhope yanu ing'ayime kuti tichiziwe!