Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Nyimbo 78 - Bhukhu la Kuyamba


Mulungu nawanthu wake
Masikili ya Asafi

1 Tetekelani, imwe wanthu wangu mafundiso yangu! Teyani makutu yanu kumafala yamulomo wangu!

2 Nin'zafungula mulomo wangu ndichilewa ntsumo, nin'zathubula mafala yakabisila yakale,

3 bzinthu bzatidabva, bzantin'dziwa, bzatidawuziwa namakholo yathu.

4 Tin'zabzisa lini kwawana wawo, koma tin'zawuzambo kum'badwe um'bwela, madumbizo ya Chawuta nam'phamvu zake, nabzidabwiso bzaadachita.

5 Adakhazikisa umboni mwa Jakobho, achiyikha mafundiso mu Izraeli. Yaadawuza azipayi wathu, kuti akadziwise wana wawo;

6 kuti m'badwe um'bwela uzayadziwembo, wana anati abadwa, kuti azasumuke achizawuzambo wana wawo,

7 pomwe azayikhe chinyanganilo chawo mwa Mulungu, azaleke kuyebwa mabasa ya Mulungu, koma kuti azachengete mitemo yake;

8 pomwe aleke kukhala ninga azipayi wawo, m'badwe wantimbo nawumphandupandu, m'badwe wantima wakusaya kukhazikika, wan'zimu wakusaya kukhulupilika kwa Mulungu.

9 Wanthu wa Efulemu akhadapakatila utati, adabwelela m'mbuyo pantsiku yankhondo.

10 Alibe kuchengeta chibvano cha Mulungu, koma adalamba kuteyeza mafundiso yake.

11 Adayebwa bzaakhadachita, nabzidabwiso bzaakhadaawonesa.

12 Pamaso paazipayi wawo adachita bzidabwiso, mudziko la Ijipiti, mumbuto za Zowani.

13 Adapatula nyanja kuti apite napamwepo, adachita kuti madzi yayime ninga mudwi.

14 Masikati akhaatsogolela nantambo, usiku wentse nanguli zamoto.

15 Adabadula minyala muchipululu, achiwapasa madzi mazinji yakumwa ninga yan'choka mum'boo.

16 Adachitisa kuti tumikulo tuchoke pamwala, adachitisa kuti madzi yayelele ninga tukamadzi.

17 Koma wanthu adapitiliza kumutazila, kupandukila Nyakudzulu-dzulu mumbuto yakuwuma.

18 Adayesa Mulungu m'mitima yawo, achipopa chakudya chaakhafuna.

19 Akhang'ung'uzikila Mulungu adati, “Ko Mulungu angakwanise kutikonzela chakudya muchipululu?

20 Wonani, adamenya mwala pamwepo madzi nkuyelela! Tumikulo tudafashukila. Pomwe angakwanise kupeleka chakudya, panango kupasa nyama wanthu wake?”

21 Nakutenepo Chawuta paadabzibva adakalipa, moto udagakila Jakobho, ukali wake udamukila Izraeli.

22 Pakuti akhalibe kukhulupilila mwa Mulungu, pomwe alibe kuthemba namphamvu zake zakuchiza.

23 Koma adawuza mitambo kudzulu, achifungula misuwo yakudzulu;

24 adaabvumbisila mana kuti adye, adaapasa mphunga zakudzulu.

25 Wanthu adadya chakudya changilozi, adaapasa chakudya chizinji kwene-kwene.

26 Adachita kuti chonzi chakumabveladzuwa chikukume kudzulu, namphamvu zake adatsogolela chonzi chakunyantsi.

27 Adaabvumbisila nyama ninga pfumbi, mbalami zamaphaphilo ninga n'chenga wamumphepete mwanyanja.

28 Adachita kuti zigwele pakati pamisasa yawo, kuzungunuka mbuto zaakhakhala.

29 Adadya achikhuta kwene-kwene, pakuti adaapasa bzaakhatopa.

30 Koma kutopa kwawo kukanati kwamala, chakudya chawo chichali nkamwa,

31 ukali wa Mulungu udaabwelela, adapha amuna wentse wakulimba, adagwesa pantsi alumbwana wa Izraeli.

32 Ne tenepo bzabzene, iwo adapitiliza kutaza, ne nabzidabwiso bzake, alibe kukhulupilila.

33 Adamaliza ntsiku zawo papezi, magole yawo mukugopa.

34 Paadapha anango, adamupsaga, adatembenuka achipsaga Mulungu mwamphamvu.

35 Adakumbukila kuti Mulungu, akhali mwala wawo, Mulungu Nyakudzulu-dzulu nyakuwalombola.

36 Koma adamuphata kumaso namilomo yawo, adamunamiza namalilimi yawo.

37 Mitima yawo ikhalibe kukhazikika mwayiye, akhalibe kukhulupilika pachibvano chake.

38 Koma iye nachifundo chake, adagwanila bzakuyipa bzawo, alibe kuwacheneka. Adabweza ukali wake kazinji, alibe kulamusa ukali wake wentse.

39 Adakumbukila kuti wanthu ninyama, mphepo bzayene impita ichizasaya kubwelela.

40 Ko nkangasi kaadamupandukila muchipululu, pomwe nkangasi kaadamuwawisa mumbuto yapezi-pezi?

41 Adayesa Mulungu kawili-kawili, adawawisa Wakuyela wa Izraeli.

42 Alibe kukumbukila janja lake, panango ntsiku yaadaalombola kwaazondi wawo;

43 paadachita bzilatizo bzake mu Ijipiti, namatsenga yake muthengo la Zowani.

44 Adasandula tukamadzi twawo kuchita gazi, kuti ataze kumwa madzi yamutukamadzi twawo.

45 Adatuma pakati pawo nchenche zizinji zikhaadya, naachule akhaacheneka.

46 Adapeleka mbewu zawo kuwadzomba, namichelo yamphamvu zawo adayipasa mabombo.

47 Adacheneka mivayini yawo namatalala, adabvuludza miti yawo yankhuyu namphepo.

48 Adapha ng'ombe zawo namatalala, pomwe bzifuwo bzawo nampheni.

49 Adaathusila ukali wake un'gopsa, nkwiyo ukulu kwene-kwene nanthamu, pomwe nachipani changilozi zin'cheneka.

50 Adakonzela ukali wake njila, alibe kuchiza umoyo wawo kuyimpfa, koma adapeleka umoyo wawo kukuchenekeka.

51 Adaswa wentse wana wakuyamba wamu Ijipiti, wakuyamba wamphamvu zawo m'matenti ya Hamu.

52 Iye adatsogolela wanthu wake ninga mabila, adaatsogolela muchipululu ninga bzifuwo.

53 Adaatsogolela mwakuchinjilizika, kuti aleke kukhala namantha, koma nyanja idanyuza azondi wawo.

54 Adaabwelesa kumbuto yake yakuyela, kuphili lake laadatola najanja lake ladidi.

55 Adathamangisa mishowo yawanthu patsogolo pawo, achiwagawila nthaka, achikhazika nshowo wa Izraeli m'matenti yawo.

56 Koma iwo adayesa achipandukila Mulungu Nyakudzulu-dzulu, pomwe alibe kuteyeza umboni wake,

57 adapanduka, achichita mwakusaya kukhulupilika ninga azipayi wawo, adapotoka ninga utati wakulenda.

58 Pakuti adanyokosa ukali wake nambuto zawo zaamilungu wakunja, adamuchitisa kuti achite nchanje nabzifanikizo bzawo.

59 Mulungu adabva, pomwe adakalipa, adalamwilatu Izraeli.

60 Adalinza ngoto mbuto ya Shilo, tenti yake pakati pawanthu.

61 Adapeleka mphamvu zake kuwulanda, mbili yake m'manja mwan'zondi.

62 Adapeleka wanthu wake kubhemba, achithululila ukali wake panthaka yake.

63 Moto udambombomesa wachilumbwana wawo, wachitsikana wawo adasaya nyimbo zakuloodwa.

64 Anyantsembe wawo adagwa kubhemba, adziche wawo alibe kuwalila.

65 Pamwepo Mfumu adalamuka ninga wachoka patulo, ninga wankhondo wawongota navinyu.

66 Adamenyela kumbuyo azondi wake, achiwanyazisa kufika lini nalini.

67 Adalamba tenti ya Jozefi, alibe kusankhula nshowo wa Efulemu.

68 Koma adasankhula nshowo wa Judha, phili la Ziyoni, laanfuna.

69 Adamanga mbuto yake yakuyela ninga kudzulu-dzulu, ninga dziko laadakhazikisa chikhalilo,

70 Adasankhula Dhaveti mulanda wake, adamuchosa kuwunyakabusa,

71 kwaakhanyanganila mabila yawana, achikakhala nyakabusa wawanthu wake Jakobho, nthaka yake Izraeli.

72 Adaanyanganila nantima wakukwana, achiwatsogolela najanja lakubvesesa.

Bhaibheri reChikunda © Bible Society of Zimbabwe

Bible Society of Zimbabwe
ကြှနျုပျတို့နောကျလိုကျပါ:



ကြော်ငြာတွေ