Nyimbo 76 - Bhukhu la Kuyamba

Kukunda kwa Mulungu

Kwanyakuyimbisa nabzakuyimbisa bzina thambo. Nyimbo ya Asafi. Nyimbo.

¹ Mulungu an'dziwika mu Judha, dzina lake nilikulu mu Izraeli.

² Jese lake lili mu Salemu, mbuto yake yakukhala ili mu Ziyoni.

³ Kumweko adaphwanya misewe ikhayetima, nchinjilizo nabhemba nabzida bzankhondo. Selah.

⁴ Muna ukulu, muna ndemela kuposa mapili yan'khala nyama zan'thengo.

⁵ Wakulimba ntima adatolelewa sipodyo yawo, agona tulo. Amuna wamphamvu wentse wankhondo adataza kuseyenzesa manja yawo.

⁶ Nakutsimula kwanu, imwe Mulungu wa Jakobho, wentse, nyakukwila nahachi adagwa pantsi nkufa.

⁷ Koma imwe, mun'gopsa kwene-kwene! Mbani angayime patsogolo panu, ukali wanu ukasumuka?

⁸ Muli kudzulu mudachita kuti kutonga kwanu kubveke, dziko lidagopa lichinyamalilatu;

⁹ pamudasumuka kuti mutonge, imwe Mulungu! Kuti muchize wentse wakupondelelewa wapadziko lapantsi. Selah.

¹⁰ Chadidi ukali wawanthu un'zakudumbizani, ukali unsala mun'zawubvala ninga n'cheka.

¹¹ Lumbila, nakuchita bzawalumbilila kwa Chawuta Mulungu wako. Lekani wentse adamuzungunuka abwelese mpfupo, kwawuyo anfunika kugopewa,

¹² am'phwanya n'zimu wakubzikuza wamanduna, an'gopewa namazimambo yadziko lapantsi.