Nyimbo 74 - Bhukhu la Kuyamba

Pemphelo lakuchiziwa kwadziko

Masikili ya Asafi

¹ Imwe Mulungu, thangwe lanyi kutitayilatu? Thangwe lanyi ukali wanu um'pwititikila mabila yamuthanga lanu, ninga utsi?

² Kumbukani wanthu wanu wamudasankhula kale-kale, wamudalombola kuti akhale nshowo wanthaka yanu! Kumbukani phili la Ziyoni lamudambakhala.

³ Fambisani makhalo yanu kumathele yachikhalilo; bzentse bzidaphwanyiwa nan'zondi mumbuto yakuyela!

⁴ Azondi wanu adawongota nkati mwambuto yanu yakuyela, adayikha mabandela yawo m'mwemo kuchita bzilatizo bzakukunda kwawo.

⁵ Akhachita ninga wanthu ansamula mbadzo, achitema majese.

⁶ Matabwa yentse yakukomedzesewa nakusema, adaphwanya nambadzo nasando.

⁷ Adatentha mbuto yanu yakuyela namoto, adagwesela pantsi achipsipisa mbuto yadzina lanu.

⁸ Iwo adati m'mitima yawo, “Tiniwapondelelelatu”, adatentha mbuto zentse zakugumanilana za Mulungu mudziko.

⁹ Tichawona lini bzilatizo bzathu bza Mulungu, maprofita kuchalibe, pomwe pakati pathu pachalibe ne m'bodzi an'dziwa kuti bzintola nthawe itali tani.

¹⁰ Ko bzifike lini, imwe Mulungu n'zondi achimbanyomba? Ko iye n'zondi akhale achinyoza dzina lanu kufika lini nalini?

¹¹ Thangwe lanyi mum'bweza janja lanu? Thangwe lanyi muniyikha janja lanu ladidi kumbuyo?

¹² Pakuti imwe Mulungu mambo wangu ndimwe wakale, mum'bwelesa chipulumuso nkati mwadziko.

¹³ Mudagawa nyanja namphamvu zanu, mudaphwanya misolo yabzilombo bzam'madzi.

¹⁴ Mudaphwanya misolo yachi Leviyatani, ntumbi wachene muchiwupeleka ninga chakudya kubzinyama bzamuchipululu.

¹⁵ Mudafungula ntsantsa natumikulo, mudawumisa tukamadzi tukhasaya kuwuma.

¹⁶ Masikati niyanu nawusiku niwanu pomwe, ndimwe mudakhazikisa kuwinika nadzuwa.

¹⁷ Mudayikha malile yentse yadziko, mudakonza mayinza namumphepo.

¹⁸ Kumbukani ibzi, imwe Chawuta, kunyomba kwaan'chita n'zondi! Pomwe malombe yan'nyoza dzina lanu.

¹⁹ Lekani kupeleka moyo wanjiwa yanu kubzinyama bzan'thengo! Lekani kuyebwelatu umoyo wawanthu wanu wakushupika!

²⁰ Ikhilani nzelu kuchibvano chanu, pakuti mbuto zan'dima zamudziko zidadzala nawanthu wandewo!

²¹ Lekani kuti wakupondelelewa anyazisiwe! Lekani amphayi naansaya adumbize dzina lanu!

²² Sumukani, imwe Mulungu mubziyimilile! Kumbukani kunyomba kwamun'chitiwa namalombe ntsiku yentse!

²³ Lekani kuyebwa chiwowo chaazondi wanu, kusokosa kwaawo akumukilani bzinsaya kumala!