Nyimbo 73 - Bhukhu la Kuyamba

Kulinganiza kwa Mulungu

Nyimbo ya Asafi.

¹ Chadidi Mulungu niwabwino kwaa Izraeli kwaawo adachena ntima.

² Koma ine nzayo zangu zikhali pang'ono kugunkhunthiwa, makhalo yangu yadasala pang'ono kutelela.

³ Pakuti ndidabva nchanje naawo am'bzikuza, pandidawona nkhalo yawakuyipa.

⁴ Pakuti alibe nyathwa, mathupi yawo niyakunenepa.

⁵ Ali lini munthamu ninga anango wanthu, anshupika lini ninga anango wanthu.

⁶ Nakutenepo kusamwa ndiyo makhoza yawo yan'khosi, ndewo ndicho chakubvala chawo.

⁷ Maso yawo yam'bula nakunenepa, mitima yawo intayikila nankhumbukila zabzakuchita.

⁸ An'nyomba achilewa-lewa namafala yakuyipa, an'gopsezela nakupondelela.

⁹ Anfungula milomo yawo achichepsa kudzulu, pomwe lilimi lawo lintonga padziko lapantsi.

¹⁰ Nakutenepo wanthu wake an'chungunuka achiwapembeza, achisaya chakuyipa mwayiwo.

¹¹ Anilewa kuti, “Ko Mulungu angabzidziwe tani? Ko muna kudziwa mwayiye Nyakudzulu-dzulu?”

¹² Mwawona, awa niwakuyipa, nthawe zentse anshupika lini, achithimizila chuma chawo.

¹³ Koma ine ndidachenela moyo papezi, ndakhala ndidachena pakuchita chakuyipa.

¹⁴ Pakuti dzuwa lentse ninshupika, ndichitsimuliwa machibese yokha-yokha.

¹⁵ Ninga ndikhadati, “Nin'lewa ibzi,” wonani, ndikhadatayisa m'badwe wawana wanu.

¹⁶ Koma pandidakumbuka kuti ndibvesesese bzimwebzi, ndidawona kuti bzikhawuma,

¹⁷ kufikila ndayenda kumbuto yakuyela ya Mulungu, pamwepo ndidabvesesa kumala kwawo.

¹⁸ Chadidi mudaayikha mumbuto zintelela, mun'zachita kuti agwele mukuchenekeka.

¹⁹ An'zawoneka ali mungozi mwadzidzimu, achiphsayiliwa nabzinthu bzin'gopsa!

²⁰ Ali ninga maloto, munthu akalamuka, imwe Mfumu, mukalamuka muniyanyoza.

²¹ Ntima wangu pawukhabva kuwawa, pandikhadalasiwa ntima,

²² ndikhadapusa, kwakusaya kudziwa, ndikhali ninga nyama yan'thengo kwayimwe.

²³ Ne tenepo bzabzene ndina imwe nthawe zentse, imwe mum'phata janja langu ladidi.

²⁴ Munin'tsogolela namalango yanu, pakumalizila muchizanditambila nambili.

²⁵ Mbani wandinaye kudzulu kunja kwayimwe? Palibe chilipo padziko lapantsi chaninfuna kunja kwayimwe.

²⁶ Thupi langu nankhumbukila zangu bzingataze, koma Mulungu ndiye mwala wantima wangu nachigawo changu kufika lini nalini.

²⁷ Pakuti mwawona, awo ali kutali nayimwe an'zamala, mun'cheneka wentse ali lini pachadidi kwayimwe.

²⁸ Koma kwayine n'chabwino kuti ndikhale pafupi na Mulungu, ndidachita Mfumu Chawuta pakupotela pangu, kuti ndilalikile mabasa yanu yentse.