Nyimbo 71 - Bhukhu la Kuyamba

Pemphelo lamunthu wakalamba

¹ Imwe Chawuta nimpotela mwayimwe, lekani kundinyazisa!

² Muchilungamo chanu ndipulumuseni, mundichize! Teyani khutu lanu kwayine, mundithangate!

³ Khalani mwala wangu wakubisalila, kwanin'khala ndichiyenda nthawe zentse! Pakuti imwe ndimwe mwala wangu, pomwe ndimwe mpanda wangu, kuti undichize.

⁴ Imwe Mulungu wangu ndichizeni m'manja mwawanthu wakuyipa! M'manja mwawanthu wakusaya kulungama, wadima!

⁵ Pakuti imwe ndimwe chinyanganilo changu, Imwe Mfumu Chawuta ndimwe chikhulupililo changu kuyambila pawubwana wangu.

⁶ Ndidatsendamila kwayimwe kuyambila pakubadwa pangu, ndimwe mudandigwata n'chombo, dumbizo langu lin'khala kwayimwe nthawe zentse.

⁷ Ndakhala chinthu chin'dabwisa azinji, koma imwe ndimwe kwakupotela kwangu kwakulimba.

⁸ Mulomo wangu udadzala namadumbizo yanu, pomwe nin'choma dzuwa lentse n'chikupasani mbili.

⁹ Panthawe yakukalamba kwangu lekani kunditaya! Panim'mala mphamvu lekani kundisiya!

¹⁰ Pakuti azondi wangu akundilewa, pomwe awo anfuna moyo ampangana,

¹¹ achilewa kuti, “Mulungu wamutaya, muteyeleni mum'phate, pakuti palibe animupulumusa!”

¹² Imwe Mulungu, lekani kukhala kutali nayine! Mulungu wangu, kulumizani kubwela kuzandithandiza.

¹³ Awo ampasa mulandu moyo wangu, ngaanyazisiwe, amaliletu! Lekani agwaniliwe namanyozo namanyazi! Awo ampsaga kundipweteka.

¹⁴ Koma ine ndininyanganila nthawe zentse, nin'zapitiliza kukudumbizani. Selah.

¹⁵ Mulomo wangu un'zalewa bzakulungama bzanu, ntsiku yentse nin'zalewa bzachipulumuso chanu, pakuti nin'kwanisa lini kubziwelenga.

¹⁶ M'mabasa yamphamvu ya Mfumu Chawuta, nin'zaakumbusa chikulungamo chanu basi!

¹⁷ Imwe Mulungu mudandifundisa kuyambila pawung'ono wangu, kufika tsapano, nin'lalikila mabasa yanu yan'dabwisa.

¹⁸ Kufikila ndakalamba, kufikila ndachena nsolo, imwe Mulungu lekani kundisiya! Kufikila ndalalikila bzamphamvu zanu kum'badwe unango, mphamvu zanu, kwawentse am'bwela.

¹⁹ Imwe Mulungu, chilungamo chanu chinfika kudzulu; mudachita bzinthu bzikulu kwene-kwene. Mbani adalingana nayimwe, imwe Mulungu?

²⁰ Mudandiwonesa kushupika nanyathwa zizinji, koma mun'zandipasa mphamvu pomwe, mudandibweza kumbuto yawanthu wakufa.

²¹ Mun'zathimizila kulemekezewa kwangu, muchindinyamaliza pomwe.

²² Koma ine, nin'zakudumbizani nachipendani, nathangwe lachikhulupililo chanu, imwe Mulungu wangu. Nin'zayimba nyimbo kwayimwe nabhanjo, imwe wakuyela wa Izraeli.

²³ Milomo yangu in'zachemelela nakukondwa, paniniyimba nyimbo kwayimwe, pabodzi namoyo wangu wamudalombola.

²⁴ Nakutenepo, lilimi langu lin'zalewa-lewa bzachilungamo chanu ntsiku yentse, pakuti wale ampsaga kundipweteka anyazisiwa, adodomesewa.