Nyimbo 7 - Bhukhu la Kuyamba

Shigayoni ya Dhaveti yaadayimbila Chawuta nabza Kushi mu Bhenjemani

¹ Chawuta Mulungu wangu, nimwayimwe mwanim'bisala, mundichize nakundipulumusa kwawentse akunditeyela,

² angakwachule-kwachule moyo wangu ninga bzin'chita mphondolo, anganding'ambe pachisaya anin'thandiza.

³ Chawuta Mulungu wangu, ndikachita tenepo, ndikaphata chakuyipa namanja yangu,

⁴ ndikabwezela chakuyipa nachakuyipa, ndikatazila n'zondi wangu palibe mulandu,

⁵ lekelelani n'zondi wangu achinditeyela, andiphate, andiponde-ponde pantsi, ayikhe mbili yangu mudongo! Selah.

⁶ Sumukani Chawuta nawukali wanu! Imani mumenye nkwiyo waazondi wangu! Lamukani mundithandize, pakuti ndimwe mudatonga kuti pakhale nakulinganiza.

⁷ Nakutenepo mukocheze wanthu wentse patsogolo panu, imwe muli pampando wapadzulu muchiwatonga.

⁸ Chawuta ndimwe muntonga wanthu! Chawuta munditonge, muchinyangana chilungamo changu, nakukhuma kwangu muchikhulupililo.

⁹ Mulungu wakulungama, muniyesa mitima yawanthu nanzelu zawo; chitani kuti wakuyipa aleke bzakuyipa bzake, sumusani wentse an'chita bzabwino!

¹⁰ Mulungu ndiye nchinjilizo yangu, an'chiza wentse wakukonkholoka ntima.

¹¹ Mulungu nintongi wakukonkholoka, ni Mulungu aniwonesa ukali wake nthawe zentse.

¹² Munthu akaleka kusiya bzakuyipa bzake, Mulungu an'noza bhemba lake, an'thamula utati wake.

¹³ Ankonzeka bzida bzake achichita kuti misewe yake igake moto.

¹⁴ Wonani wakuyipa ankumbuka bzakuyipa, nthawe zentse am'phata mimba yanthamu, am'bala magunkha.

¹⁵ An'chela dindi, achilifukula, an'gwela mudindi laadachela.

¹⁶ Milandu yawo in'zagwela pamisolo yawo, ndewo zawo zin'zakulumukila padzulu pamisolo yawo.

¹⁷ Nintenda imwe Chawuta nathangwe lakulungama kwanu, nin'zayimba ndichidumbiza dzina la Chawuta, Nyakudzulu-dzulu.