Nyimbo 68 - Bhukhu la Kuyamba

Nyimbo yadziko likakunda

Kwanyakuyimbisa. Salimo ya Dhaveti. Nyimbo.

¹ Lekani Mulungu asumuke, azondi wake amwaziwe! Awo animuzonda athawe patsogolo pake!

² Ninga kulothoka kun'chita utsi, nakutenepo athamangiseni, ninga kusungunuka kun'chita phula pamoto! Lekani wakuyipa achenekeke patsogolo pa Mulungu.

³ Koma lekani wakulungama akondwe, asekelele patsogolo pa Mulungu! Lekani akondwe nakusekelela!

⁴ Imbilani Mulungu! Imbani nyimbo muchidumbiza dzina lake! Sumusani uyo anfamba m'mitambo! Dzina lake ni Chawuta. Mpembezeni nakukondwa patsogolo pake!

⁵ Payi wankhungwa nyakuchinjiliza adziche, Mulungu ali mumbuto yake yakuyela.

⁶ Mulungu ampasa wamphukwa muyi wakukhala, an'chosa wakumangiwa achiwapasa nkhalo, koma mphandu-pandu zinkhala mumbuto yakuwuma.

⁷ Imwe Mulungu pamudatsogolela wanthu wanu, pamudafamba namuchipululu, Selah,

⁸ dziko lidatekenyeka, kudzulu kudabvumbisa mvula, patsogolo pa Mulungu, imwe waku Sinayi, patsogolo pa Mulungu, Mulungu wa Izraeli.

⁹ Imwe Mulungu mudabvumbisa mvula izinji, mudabwezela pomwe nthaka yanu ikhatandazika.

¹⁰ Wanthu wanu adawona pakukhala, mumpasa wakusaya, imwe Mulungu, thangwe lakukoma kwanu.

¹¹ Mfumu ampeleka fala lake, azikazi azinji aniwilikiza mafala adati,

¹² “Mazimambo yawankhondo an'thawa! An'thawa!” Azikazi wapanyumba an'gawana sipodyo,

¹³ ne mun'khala m'mathanga yamabila, maphaphilo yanjiwa yadatsutsutiwa nasiliva nagolidhe iniyetima.

¹⁴ Nyamphamvu zentse paadamwaza mazimambo, madzi yawufa yadagwa pa Zalimoni.

¹⁵ Iwe phili la Mulungu! Phili la Bhashani! Iwe phili lamisolo mizinji! Phili la Bhashani!

¹⁶ Thangwe lanyi iwe, phili lamisolo mizinji, un'nyangana nanchanje kuphili linfuniwa na Mulungu, paphili paanfuna kukhala? Pamwepo Chawuta an'zakhalapo kufika lini nalini?

¹⁷ Ngolo za Mulungu zankhondo, ziniwelengeka lini kuwanda kwazene, nimasawuzande namasawuzande padzulu pamasawuzande, Mfumu adachoka ku Sinayi achikapita kumbuto yakuyela.

¹⁸ Pamudakwila kumbuto itali, muchitsogolela wakupambiwa, mudatambila mpfupo kuchoka kuwanthu. Ne pakati pawanthu wakupanduka, kuti Chawuta Mulungu akhalemo.

¹⁹ Mfumu ngaadalisiwe, antitakulila nthamu zathu ntsiku zentse, Mulungu ndiye chipulumuso chathu. Selah.

²⁰ Mulungu wathu ni Mulungu wachipulumuso, Kwa Chawuta Mfumu ndiko kun'choka kuchiziwa kuyimpfa.

²¹ Chadidi Mulungu an'zaphwanya misolo yaazondi wake, ngundu yatsitsi yawuyo anfamba munjila zakuyipa.

²² Mfumu adati, “Nin'zaabweza kuchoka ku Bhashani, nin'zaabweza kuchoka pantsi pamadzi yamunyanja,

²³ kuchitila kuti unike nzayo zako mugazi, kuti mbwaya zako ziwonembo chakudya kufika zabzikhutila.”

²⁴ Mulungu n'dungwe wawanthu wanu wawoneka, n'dungwe wa Mulungu wangu, mambo wangu, mumbuto yakuyela.

²⁵ Anyakuyimba ali kutsogolo, anyakuliza bziniliziwa ali kumambuyo, pakati pawo pana atsikana akuliza bzikhwechele.

²⁶ Dalisani Mulungu pakati pawanthu azinji! Dalisani Chawuta, imwe mwentse wantsantsa ya Izraeli!

²⁷ Pana Bhenjemani nshowo ung'ono ndiwo ukutsogolela, akulu-akulu waa Judha nabzipani bzawombo, achiteyezewa naakulu-akulu wa Zabhuluni naakulu-kulu Nafitali.

²⁸ Chemelani mphamvu zanu, imwe Mulungu! Wonesani mphamvu zanu, imwe Mulungu! Ninga bzamudambachita kale.

²⁹ Nathangwe la Tembele yanu ili ku Jerusalema, mazimambo yan'zabwelesa mpfupo kwayimwe.

³⁰ Tsimulani bzinyama bzin'khala m'mitete, tsimulani mishowo yawanthu ininga ntiti wang'ombe nawana wazene. Pondezani awo anfunisisa kupasiwa masheleni, mwazani wanthu ankondwa nankhondo.

³¹ Manduna yan'zachoka ku Ijipiti, Kushi in'zakulumiza kusumusa manja kwa Mulungu.

³² Imbilani Mulungu, imwe umambo wapantsi! Imbani nyimbo muchidumbiza Mfumu! Selah.

³³ Kwawuyo ankwila padzulu pakudzulu kuyambila kale, pomwe antuma fala lake, fala lake lamphamvu.

³⁴ Wilikizani mphamvu za Mulungu, ndemela yake ili pa Izraeli, namphamvu zake zinfika kumitambo.

³⁵ Mulungu an'gopsa ali mumbuto yake yakuyela, Mulungu wa Izraeli, ampasa mphamvu achilimbisa wanthu wake. Mulungu ngaadalisiwe.