Nyimbo 67 - Bhukhu la Kuyamba

Nyimbo yakutenda.

Kwanyakuyimbisa nagitale. Salimo. Nyimbo.

¹ Lekani Mulungu atikomele ntima pomwe atidalise! Awinike nkhope yake kwayise! Selah.

² Pamwepo njila zanu zin'zadziwika padziko, chipulumuso chanu chin'zadziwika kumishowo yentse.

³ Lekani wanthu akudumbizeni imwe Mulungu! Lekani wanthu wentse akudumbizeni!

⁴ Lekani mishowo yentse yawanthu ikondwe, iyimbe nakukondwa! Pakuti muntonga wanthu wentse nakulinganiza, muchitsogolela mishowo yawanthu padziko. Selah.

⁵ Lekani wanthu akudumbizeni imwe Mulungu! Lekani wanthu wentse akudumbizeni!

⁶ Dziko lidabulisa bzakukolola, Mulungu, Mulungu wathu an'zatidalisa!

⁷ Mulungu an'zatidalisa, pomwe mapeto yentse yadziko yanimugopa.