Nyimbo 62 - Bhukhu la Kuyamba

Kukhulupilila Mulungu

Kwanyakuyimbisa kuteyeza pa Jedhutuni. Nyimbo ya Dhaveti.

¹ Kwa Mulungu yekha, moyo wangu un'dikhila kachete-chete, chipulumuso changu chin'choka kwayiye.

² Iye yekha ndiye mwala wangu, nachipulumuso changu, ndiye mpanda wangu, nin'zatekenyesewa lini kwene-kwene.

³ Kufika lini imwe mwentse muchifuna kumenya munthu kuti mumuphe? Ninga mpanda wakuphseyama?

⁴ Chadidi ankumbuka kumugwesela pantsi, achimuchosa pambuto yake yapadzulu, ankondwa kwene-kwene kulewa magunkha. Namilomo yawoyo achidalisa, koma nkati mwamitima achitembelela. Selah.

⁵ Kwa Mulungu yekha, moyo wangu un'dikhila kachete-chete, kuchiziwa kwangu kun'choka kwayiye.

⁶ Iye yekha ndiye mwala wangu, nachipulumuso changu, ndiye mpanda wangu, nin'zatekenyesewa lini kwene-kwene.

⁷ Pana Mulungu ndipo pana chipulumuso changu pomwe nakulemekezewa kwangu, Mulungu ndiye pakuthawila pangu, ndiye mwala wamphamvu zangu.

⁸ Imwe wanthu thembani na Mulungu nthawe zentse! Thululani ntima wanu patsogolo pake! Mulungu nipakupotela pathu.

⁹ Wanthu nimphepo basi, mwana wamunthu nigunkha. Apimeni muwone, adapepuka kuposa mpuye.

¹⁰ Leka kuthemba nakupamba, panango kuba namphamvu. Leka kuyikha chikhulupililo chapezi pachuma, Ne chuma chako chikawanda, leka kuyikha ntima wako kumweko.

¹¹ Kabodzi Mulungu adalewa, Kawili ndidabva, kuti, Mulungu niwamphamvu.

¹² Kwayimwe Mfumu ndiko kun'choka ntsisi, pakuti imwe mumpagali munthu kuteyeza mabasa yake.