Nyimbo 60 - Bhukhu la Kuyamba

Pemphelo lakuchilisiwa

Kwanyakuyimbisa kuteyeza Shushani Eduti. Mikitami ya Dhaveti, yakuwuza paadashupana na Aramu-naharayimu na Aramu-zobha, apo Joabhi paakhabwelela kapha a Edhomu masawusande khumi naawili mugowa lamunyu.

¹ Mulungu mwatilamba, mwatisandukila; mwatikalipila. Tibwezeleni pomwe kwayimwe!

² Mudachita kuti dziko litekenyeke, lichikhekhemuka, konzani mikhekhe yalene, pakuti lili kutekenyeka.

³ Mudachita kuti wanthu wanu awone kushupika, mudatipasa vinyu, idatidzedzelesa.

⁴ Mudapasa bandela wentse ankugopani, kuti achiziwe kuwutati. Selah.

⁵ Nakutenepo wanthu wamunfuna achilisiwe, janja lanu ladidi litipulumuse, pomwe mutidayile.

⁶ Mulungu adalewa-lewa ali pambuto yake yakuyela adati: “Nin'zakunda, nin'zagawa guta la Shekemu! Nin'zapima gowa la Sukoti.

⁷ Giliyadhi niyangu, Manase niyangu, pomwe Efulemu n'chapewu changu, Judha nimphsimbo yangu yawumambo.

⁸ Moabhi nichombo changu chakusambila, pa Edhomu ndipo paninthusa shango zangu, pa Filisitiya ninkuwa mwakukunda.”

⁹ Ko mbani an'zandiyendesa kuguta lakuchinjiliziwa, ko mbani an'zanditsogolela ku Edhomu?

¹⁰ Ko Mulungu chadidi mwatilamba ise? Mulungu muniyenda lini nawankhondo wathu?

¹¹ Tithandizeni kwaazondi wathu, pakuti chipulumuso chamunthu chilibe mbweza.

¹² Mwa Mulungu tin'zakunda, pomwe an'zaponda-ponda azondi wathu.