Nyimbo 59 - Bhukhu la Kuyamba

Pemphelo lakupsaga thandizo

Kwanyakuyimbisa kuteyeza Leka Kuphwanya. Mikitani ya Dhaveti, Saulo paadatuma wanthu kanyangana nyumba yake kuti amuphe.

¹ Mulungu wangu, ndipulumuseni kwaazondi wangu! Ndilomboleni kwaawo anim'mukila!

² Ndipulumuseni kwaawo an'chita mabasa yakuyipa! Ndichizeni kwaawo wanthu antaya gazi!

³ Pakuti nyanganani adatoyimila moyo wangu! Wanthu wamphamvu an'gwezekana kuyimila ine, palibe chakuyipa panango kutaza kwandidachita.

⁴ An'thamanga achikonzeka, koma ine palibe kutaza kwandidachita. Lamukani, bwelani mugumane nayine, muwone!

⁵ Koma imwe Chawuta Mulungu wawankhondo, Mulungu wa Izraeli, lamukani mulange madziko yentse! Lekani kukomela ntima wentse a'nchita chinyengo chakuyipa!

⁶ Mawulo yokha-yokha am'bwela, achikhumbza ninga mbwaya, achizungunuka guta.

⁷ Wonani makamwa yawo yan'thulula mafala, m'milomo yawo muna mabhemba, achimbati, “Ko mbani antibva?”

⁸ Koma imwe Chawuta mun'zaaseka, mun'zanyoza madziko yentse.

⁹ Imwe Mphamvu zangu, nin'zanyanganila imwe pakuti imwe Mulungu ndimwe pakuthawila pangu.

¹⁰ Mulungu nantsisi zangu an'zabwela kwayine, Mulungu an'zachita kuti ndiwone azondi wangu achikundiwa.

¹¹ Mulungu lekani kuwapha, kuti wanthu wangu aleke kuyebwa ngaazungayile namphambvu zanu, pomwe muwabweze pantsi, imwe Mfumu nchinjilizo yathu.

¹² Nathangwe lakutaza kwawo, namafala yamilomo yawo, ngaaphatiwe mukubzikuza kwawo. Matembelelo namagunkha yaanilewa;

¹³ amalizeni muwukali wanu! Amalizeni amaliletu! Chitani kuti adziwe kuti Mulungu antonga mu Jakobho, mpaka kumapeto yadziko lentse.

¹⁴ Mawulo yokha-yokha am'bwela, achikhumbza ninga mbwaya, achizungunuka guta.

¹⁵ An'zungunuka achipsaga chakudya, achikhumbza akaleka kukhuta.

¹⁶ Koma ine niniyimba bzamphamvu zanu, nin'zayimba ndichikondwa machibese-bese ndichiyimbila ntsisi zanu, pakuti ndimwe pakubisala pangu, pakupotela pangu panthawe yakushupika kwangu.

¹⁷ Ndimwe mphamvu zangu, nin'zayimba ndichidumbiza imwe, pakuti imwe Mulungu ndimwe pakubisala pangu, Mulungu wangu wantsisi.