Nyimbo 57 - Bhukhu la Kuyamba

Pemphelo lakukumbila thandizo

Kwanyakuyimbisa kuteyeza Leka Kuphwanya. Mikitami ya Dhaveti paadathawa kwa Saulo mumphako.

¹ Ndikomeleni ntima imwe Mulungu! Ndikomeleni ntima! Pakuti moyo wangu umpotela mwayimwe, muntunzi wamaphaphilo yanu nim'bisala, kufikila ngozi yapita.

² Ninilila kwayimwe Mulungu Nyakudzulu-dzulu, kwa Mulungu anim'bwezelela.

³ Pakuti an'zatuma kuchoka kudzulu pomwe an'zandichiza, an'zanyazisa awo animpondelela, Selah. Mulungu an'zatuma ntsisi zake nakukhulupilika kwake.

⁴ Moyo wangu uli pakati pamphondolo, nin'gona pantsi pakati pamphondolo, zinkwachula-kwachula wana wawanthu, mano yawo yaninga madipa namisewe, malilimi yawo yaninga mabhemba yakuthwa.

⁵ Imwe Mulungu sumusiwani kufika kudzulu! Ndemela yanu ngayidzadze padziko lentse lapantsi!

⁶ Azondi wangu ateya ukonde kuti andiphate, moyo wangu wakotama. Achela bwina munjila yaninfamba nayo, koma ndiwo agwelamo. Selah.

⁷ Ntima wangu udakhazikika, imwe Mulungu! Ntima wangu udakhazizika! Nin'zayimba, ndichiyimba nyimbo!

⁸ Lamuka iwe ulemelelo wangu! Lamuka, bhanjo nachipendani changu! Nin'zalamuka machibese-bese.

⁹ Nin'zakutendani imwe Mfumu, pakati pawanthu wanu! Nin'zakuyimbilani nyimbo pakati pamadziko!

¹⁰ Pakuti ntsisi zanu n'zikulu kufika kudzulu, chikhulupililo chanu chinfika m'mitambo.

¹¹ Sumusiwani imwe Mulungu, padzulu-dzulu! Ulemelelo wanu usumusiwe padzulu padziko lentse lapantsi.