Nyimbo 56 - Bhukhu la Kuyamba

Pemphelo lakukhulupilila Mulungu

Kwanyakuyimbisa kuteyeza Njiwa padzulu pa miti ya Terebhiniti. Mikitami ya Dhaveti a Filisitiya paadamuphata pa Gati.

¹ Imwe Mulungu ndikomeleni ntima, pakuti munthu akundipondelela, ntsiku yentse uyo anim'menya akundipondelela!

² Azondi wangu akundipondelela ntsiku yentse; pakuti mbaazinji akumenyana nayine mwakubzikuza.

³ Paninibva mantha, nin'zathemba imwe.

⁴ Mwa Mulungu uyo mafala yake nin'dumbiza, mwa Mulungu nin'themba, nin'zagopa lini. Ko munthu wanyama angandichitenyi?

⁵ Ntsiku yentse ansandula mafala yangu, nthawe zentse bzentse bzaampangana bzakuyipa.

⁶ Ankochezana pabodzi achindibisalila, achinyangana kufamba kwanin'chita an'dikhila moyo wangu.

⁷ Imwe Mulungu alangileni chakuyipa chawo, gweselani pantsi wanthu awa nawukali wanu!

⁸ Imwe mun'dziwa kudzudziwa kwangu, ikhani misozi yangu mugalafa lanu! Ko bzili lini mubhukhu lanu?

⁹ Pantsiku yandichachemelela kwayimwe, azondi wangu an'zachungunuka achibwezewa mbuyo. Ichi nin'dziwa, Mulungu anayine.

¹⁰ Mwa Mulungu, nin'dumbiza fala lake, mwa Chawuta, nin'dumbiza fala lake.

¹¹ Mwa Mulungu, nin'themba, nin'zagopa lini. Ko munthu angandichitenyi?

¹² Nin'zadzadzikisa bzandidalumbilila kwayimwe Mulungu, nin'zapeleka ntsembe yakutenda.

¹³ Pakuti mudapulumusa moyo wangu kuyimpfa, mudachiza minyendo yangu kuti ileke kukhukhumudwa paniniyenda patsogolo pa Mulungu, mumwenje wawumoyo.