Nyimbo 55 - Bhukhu la Kuyamba

Pemphelo lamunthu adapandukiliwa nashamwali yake

Kwanyakuyimbisa: nashiginoti. Masikili ya Dhaveti.

¹ Mulungu tetekelani pemphelo langu, lekani kubzibisa pakudandawula kwangu!

² Nditekeleni mundidayile! Ndatangwanika nadandawulo langu, pomwe ndikubuwula.

³ Nathangwe lachiwowo chaazondi wangu, nathangwe lakupondelelewa nawanthu wakuyipa. Akundisawusa, achichita chizondo nayine.

⁴ Ntima wangu ukumenya, kugopa impfa kwandiphata.

⁵ Ndaphatiwa namantha, ndikutotetemela, ngozi idamugwanila.

⁶ Ninti, “Ninga ndikhana maphaphilo ninga njiwa. Ndikhadambuluka ndichikapumula.

⁷ Ndikhadambuluka ndichiyenda kutali, ndichikakhala muchipululu. Selah

⁸ Ndikhadakulumiza kuthawa kabzipsagila pakukhala, ndichibisala mphepo yankhongolo.”

⁹ Imwe Mfumu, sokonezani malilimi yawo, pakuti niniwona nkhondo nakushupana muguta.

¹⁰ Masikati nawusiku an'zungunuka mipanda yalene, kuyipa nakushupika bzili nkati mwalene.

¹¹ Kuphwanya kuli nkati mwalene, kupondelelana nakubelana, bzin'choka lini mumbuto zawo zakugumanilana.

¹² Ninga mbaazondi wangu akhandinyoza, ndikhadalimbikila, ninga akhali n'zondi wangu akhabzikuza, ndikhadabisala kwayiwo.

¹³ Koma pakuti ndiwe, wansepetela ubodzi, mwanzangu, shamwali yangu chayiyo.

¹⁴ Tikhali ponda-ndipondembo, tikhayenda pabodzi munyumba ya Mulungu.

¹⁵ Azondi wangu ngaafikiliwe nayimpfa mwadzidzimu, ayende kudindi ali wamoyo! Pakuti bzakuyipa bzili pakati pawo, namumbuto zawo zakukhala.

¹⁶ Koma ine nin'chemela kwa Mulungu, pomwe Chawuta an'zandichiza.

¹⁷ Machibese, namasikati namawulo, nimpeleka madandawulo ndichilila, iye anibva fala langu.

¹⁸ Nandelekho, an'zapulumusa moyo wangu kunkhondo yangu, pakuti mbaazinji kwene-kwene anfuna kumenyana nayine.

¹⁹ Mulungu an'zabva, achizaachepesa, uyo nyakutonga kuyambila kale-kale, Selah uyo ansanduka lini, pomwe an'gopa lini Mulungu.

²⁰ Adapfuthula janja lake adanyanganana nashamwali zake, adaphwanya chibvano chake.

²¹ Mafala yake yakhadafewa kupita mafuta, koma nkati mwantima wake mukhana nkhondo. Mafala yake yakhadafewa kupita mafuta, koma yakhali mabhemba yakupsolomolewa kale.

²² Tula ntolo wako kwa Chawuta, iye an'zakuchengeta, anilekelela lini wakulungama achikundiwa.

²³ Koma imwe Mulungu mun'zathusila wakuyipa wentse m'manda, wanthu wagazi nawachinyengo, an'zalalama ne kati-nakati yantsiku zawo. Koma ine nin'zathemba nayimwe.