Nyimbo 52 - Bhukhu la Kuyamba

Kutonga kwa Mulungu

Kwanyakuyimbisa. Masikili ya Dhaveti, apo Dhoyegi, mu Edhomu, adayenda kawuza Saulo kuti, “Dhaveti wabwela kunyumba ya Ahimeleki.”

¹ Ko thangwe lanyi iwe unsamwa, iwe munthu wankhondo? Ntsisi za Mulungu zanayine ntsiku yentse.

² Lilimi lako linkumbuka bzakucheneka; ninga leza lakuthwa, iwe munthu wachinyengo.

³ Munfuna bzakuyipa kuposa bzabwino, muchifuna bzakulewa bzakunama pana kulewa chilungamo. Selah

⁴ Unfuna mafala yentse yam'meza yampweteka, iwe lilimi lachinyengo.

⁵ Koma Mulungu an'zakuphwanyilatu, an'zakuphata achikuchosa mutenti yako; an'zakuzula padziko lawanthu wamoyo. Selah

⁶ Wanthu wakulungama an'zabziwona an'zagopa, pamwepo an'zamuseka adati:

⁷ Nyanganani, munthu alibe kufuna kupotela kwa Mulungu, akhathemba muwunyinji wachuma chake; adachita mphamvu nakucheneka anango.

⁸ Koma ine ndili ninga muolivi wakupsipila munyumba ya Mulungu. Nin'themba nantsisi za Mulungu kufika lini nalini.

⁹ Nin'zakutendani Mulungu kufika lini nalini, nathangwe labzamudandichitila. Pomwe nin'zadikhila dzina lanu pakuti nilabwino, patsogolo pawanthu wakukhulupilika wanu.