Nyimbo 51 - Bhukhu la Kuyamba

Pemphelo lakukumbila kulekelelewa

Kwanyakuyimbisa. Nyimbo ya Dhaveti, mprofita Natani paadabwela kwayiye, iye paakhapita munyumba na Bhatishebha.

¹ Mulungu ndikomeleni ntima, nathangwe lantsisi zanu; kuteyeza unyinji wachifundo chanu, fudzani bzakuyipa bzangu!

² Ndisambikilentuni bzakuyipa bzangu! Pomwe chenesani chitazo changu!

³ Pakuti nin'dziwa kuyipa kwangu, kutaza kwangu kuli patsogolo pangu nthawe zentse.

⁴ Kwayimwe, kwayimwe mwekha ndidataza, pomwe ndachita bzakuyipa pamaso panu; Nakutenepo ndimwe wakulungama pamunilewa-lewa, nakutenepo ndimwe wakuchena pamuntonga.

⁵ Wonani ndidabadwa mubzakuyipa, mukutaza amayi wangu adaphata pathupi pangu.

⁶ Wonani, imwe munfuna chadidi muntima mwamunthu, pomwe ndichitiseni kuti ndidzewe nzelu mwakubisika mwangu.

⁷ Chosani kutaza kwangu na Hisopi, kuti ndichene! Nditsukeni, nin'zakhala wakuchena ninga thonje.

⁸ Lekani ndibve kukondwa nakusekelela! Lekani mabondo yamwatyola yakondwe!

⁹ Bisani nkhope yanu pakutaza kwangu! Pomwe nakutaza kwangu kwentse fudzani!

¹⁰ Lengani ntima wakuchena mwayine, imwe Mulungu! Bwezelani n'zimu wakuchinga mwayine!

¹¹ Lekani kunditayila kutali kuchoka kwayimwe! Pomwe, lekani kuchosa n'zimu wanu wakuyela payine!

¹² Ndibwezeleni kusekelela kwachipulumuso chanu! Ndichengeteni nan'zimu wakutetekela!

¹³ Pamwepo ine nin'zafundisa wakuyipa njila zanu, wakutaza an'zabwelela pomwe kwayimwe.

¹⁴ Ndipulumuseni pamulandu wakutaya gazi, Imwe Mulungu wachipulumuso changu! Pamwepo lilimi langu lin'zakondwa muchilungamo chanu.

¹⁵ Mfumu fungulani milomo yangu! Nakutenepo mulomo wangu un'zakudumbizani.

¹⁶ Pakuti imwe munkondwela lini nantsembe, ninga ndidakupasani. Munkondwa lini nantsembe zakutentha.

¹⁷ Ntsembe zintambiliwa na Mulungu nin'zimu wakubzichepesa; ntima wakusweka, nawaphwanyika, Mulungu munyoza lini.

¹⁸ Chitilani bzabwino Ziyoni, mukukoma ntima kwanu, mangani pomwe mpanda waku Jerusalema.

¹⁹ Pamwepo imwe mun'zakondwa nantsembe zakulungama, ntsembe zakutentha zang'ombe, pomwe nantsembe zipulumila. Pamwepo, an'zapelekela ng'ombe zimuna pambuto yakupelekela tsembe.