Nyimbo 50 - Bhukhu la Kuyamba

Nyimbo ya Asafi. Kupembeza kwachadidi

¹ Wam'phamvu, Mulungu Chawuta, anilewa achichemela dziko lapantsi, kuyambila kumabveladzuwa mpaka kumadokelo.

² Mulungu aniyetima kuchoka paphili la Ziyoni, phili labwino kwene-kwene.

³ Mulungu wathu am'bwela, pomwe ali lini chete! Moto un'tentha uli patsogolo pake, adazungunukiwa nachonzi chikulu kwene-kwene

⁴ An'chemelela dzulu napantsi, kuti atonge wanthu wake.

⁵ Kochezani wanthu wangu wakukhulupilika, wandidachita nawo chibvano nantsembe.

⁶ Dzulu limpeleka umboni wakulungama kwake, pakuti Mulungu ndiye ntongi. Selah

⁷ “Wanthu wangu tetekelani ine, pomwe nin'zalewa! Iwe Izraeli tetekela, pomwe ine nin'zafakaza ndidanyanganana nayiwe! Ndine Mulungu, Mulungu wako!”

⁸ “Ninkutsimulila lini ntsembe yawudapeleka kwayine, nampfupo zakutentha zawumpeleka patsogolo pangu, nthawe nanthawe.

⁹ Nin'zatambila lini ng'ombe imuna kuchoka nyumba mwako, panango tonde kuchokela m'mathanga yanu.

¹⁰ Pakuti bzilombo bzentse bzili nthengo m'bzangu, nang'ombe zentse zili mumbuto zakudyela n'zangu.

¹¹ Nindziwa mbalami zentse zam'mapili, nabzentse bzinfamba-famba n'thengo m'bzangu.

¹² Ninga ndikhana njala ndikhadakuwuzani lini, pakuti dziko nabzentse bzidadzala m'mwemo m'bzangu.

¹³ Ko ine nin'dya nyama yang'ombe, panango kumwa gazi lambuzi?

¹⁴ Peleka ntsembe yako yakutenda kwa Mulungu! Chita bzawudalumbila kwa Nyakudzulu-dzulu!

¹⁵ Pomwe, chemela kwayine panthawe yakushupika kwako! Ine nin'zakupulumusa, iwe uchizandipembeza.”

¹⁶ Koma kwawakuyipa, Mulungu aniti, “Thangwe lanyi mukulewa-lewa nabzamitemo yangu, panango kulewa-lewa bzachibvano changu?

¹⁷ Pakuti mun'zonda kutsimula kwangu, pomwe muchitaya mafala yangu kumbuyo kwanu.

¹⁸ Ukawona mbava, unkondwa nayo, umphatana namphombo.

¹⁹ Mulomo wako niwakulewa-lewa bzakuyipa, nthawe zentse lilimi lako lim'bwelesa chinyengo.”

²⁰ “Ndiwe wakupasa milandu abale wako, uchiyipisa mwana wam'mako chayiye.

²¹ Udachita bzentse ibzi, koma ine ndidanyamala, uchikumbuka kuti ine ndidalingana nayiwe. Tsapano ine nin'zakutsimula, ndichikupasa mulandu pamaso pako!”

²² “Kumbukani ibzi, imwe mudayebwa Mulungu, ndinati ndakung'ambani-ng'ambani, pachisayika ankupulumusani!

²³ Uyo ampeleka ntsembe zakutenda aninilemekeza; uyo anilungamisa njila yake, nin'zamuwonesa chipulumuso cha Mulungu.”