Nyimbo 49 - Bhukhu la Kuyamba

Leka kuyikha nzelu pachuma

¹ Ibvani ibzi, wanthu wentse, Tetekelani imwe mwenste mun'khala padziko lapansti,

² wentse wana wawanthu wapantsi nawapadzulu, wakukhupuka nawakushupika.

³ Mulomo wangu un'zalewa mafala yanzelu. Nkhumbukila zantima wangu zin'zakhala kubvesesesa.

⁴ Nin'zatetekela ntsumo, nin'zalapanula chilapi changu pakuyimba nyimbo na banjo.

⁵ Ko ningagopenyi panthawe yakushupika kwangu? Bzakuyipa bzaazondi wangu pabzinin'zungunuka,

⁶ wanthu an'themba chuma chawo, ansamwa nakuwanda kwachuma chawo?

⁷ Munthu ankwanisa lini kulombola m'bale wake, panango kupasa kwa Mulungu ntengo wawumoyo wake,

⁸ pakuti ntengo wawumoyo wamunthu niwukulu, unkwana lini;

⁹ kuti alalame kufika lini nalini, kuti aleke kuwona dindi.

¹⁰ Pakuti wawona kuti ne wanthu wanzelu anifa, ninga malombe nawakusaya nzelu anifambo pomwe, an'zasiya chuma kwaanango.

¹¹ Manda ndiyo yanzakhala miyi yawo kufika lini nalini, ndiyo mbuto yawo in'zakhaliwa namibadwe yawo yentse, ne paadapasa madziko madzina yawo.

¹² Munthu anawulemelelo ankhalilila lini, anfambo ninga bzin'chita bzilombo bzan'thengo.

¹³ Iyi ndiyo njila infambiwa nawanthu wakupusa, naawo am'bwela kumbuyo anthukuza bzaadachita. Selah

¹⁴ Ninga mabila yadasankhuliliwa kudindi, infa in'zakhala nyakabusa wawo, pomwe wakulungama ndiwo an'zaatonga machibese. Mathupi yawo payaniwola; kudindi ndiko kwaan'zakhala.

¹⁵ Chadidi Mulungu an'zalombola moyo wangu kumphamvu yadindi, pakuti an'zanditambila. Selah

¹⁶ Leka kugopa munthu akakhupuka, ne ulemelelo wanyumba yake ukawanda.

¹⁷ Pakuti akafa ulemelelo umwewo aniwutakula lini, ulemelelo wake aniyenda lini nawo mudindi.

¹⁸ Pakuti ne paakhana moyo akhabzidalisa: Adakudumbiza, pakuti udachita bzabwino,

¹⁹ an'zayenda kudayenda azipayi kwaan'zasaya kuwona mwenje.

²⁰ Munthu ana ulemelelo an'bvesesesa lini, anfambo ninga bzin'chita bzilombo bzan'thengo.