Nyimbo 47 - Bhukhu la Kuyamba

Ntongi wapantsi pentse

¹ Wanthu wentse wombelani manja! Kuwani kwa Mulungu nafala lakukondwa!

² Pakuti Chawuta Nyakudzulu-dzulu an'gopsa, nimambo nkulu padziko lentse.

³ Adatikundisa mishowo yentse yawanthu, achiyikha madziko pantsi panzayo zathu.

⁴ Adatisankhulila nthaka, chinsamwila Jakobho uyo waanfunisisa. Selah.

⁵ Mulungu ankwila kudzulu achikuwiliwa, Chawuta ankwila achiliziliwa wunda.

⁶ Imbani muchidumbiza Mulungu! Imbani muchidumbiza! Imbani muchidumbiza Mambo wathu! Imbani muchidumbiza!

⁷ Pakuti Mulungu ndiye mambo wapantsi pentse, imbani muchimudumbiza nanyimbo.

⁸ Mulungu antonga madziko yentse, Mulungu ankhala pampando wake wakuyela.

⁹ Atongi wamishowo yentse agwezekana, nawanthu wa Mulungu wa Abhurahamu. Pakuti nchinjilizo zadziko n'za Mulungu, pakuti iye anilemekezewa kwene-kwene!