Nyimbo 45 - Bhukhu la Kuyamba

Nyimbo yapan'chato wamambo

¹ Ntima wangu watokonyewa namafala yanu yabwino, paninilewa mabasa yangu kwamambo, lilimi langu lininga chakunembesa chanyabezi wakunemba.

² Pakuti imwe ndimwe wakukoma nkhope kupita wanthu wentse, kukoma ntima kun'choka kwathululiwa pamilomo yanu, nakutenepo Mulungu adakudalisani kufika lini nalini.

³ Imwe wakukunda pakatilani bhemba n'chuno mwanu, pakuti ndilo linkupasani ukulu nandemela.

⁴ Muwukulu wanu, kwilani muyende mukunde, muchadidi nakulinganiza, janja lanu ladidi lichite bzinthu bzin'gopsa.

⁵ Misewe yanu niyakuthwa, impita mumitima yaazondi wamambo, wanthu an'gwela pantsi panu.

⁶ Mpando wawumambo wanu, imwe Mulungu um'mala lini kufika lini nalini. Mphsimbo yanu yawumambo nimphsimbo yakukonkholoka,

⁷ munfuna kulungama muchizonda chakuyipa. Nakutenepo Mulungu, Mulungu wanu adakudzodzani, namafuta yakukondwa padzulu paanzanu.

⁸ Bzentse bzakubvala bzanu bzikununkhila Mula, nakhodzogo na Akasiya, ankukondwesani namagitale m'mizinda idakonzewa nanyanga zanzou.

⁹ Wana wachitsikana wazimambo ali pakati paakazi wakulemekezeka, mambokazi adayima kum'mbali yajanja ladidi, adabvala bzakubvala bzidakonzewa nagolidhe yaku Ofiri.

¹⁰ Tetekela kwayine iwe mwana wachitsikana, uwone, pomwe uteye khutu lako, uyebwe wanthu wako nawakunyumba yaapayi wako.

¹¹ Mambo an'zasilila kukoma kwako, umukotamile pakuti nimfumu yako.

¹² Mwana wachikazi waku Tire an'zabwela nampfupo, wanthu wakukhupuka.

¹³ Mambokazi ali muchipinda mwake nandemela yake yentse, bzakubvala bzake bzina golidhe.

¹⁴ Adayendesewa kwamambo adabvala chakubvala chake chamawala-mawala, achiteyelewa naamoye dende awo akhampelekeza.

¹⁵ Adabwelesewa achisekelela achikondwa kwene-kwene, achibwela kun'zinda wamambo.

¹⁶ Wana wanu an'zakhala pambuto pamakholo yanu, an'zakhala anemwanamambo pentse padziko.

¹⁷ Nin'zachita kuti dzina lako lizakumbukiliwe kum'badwe wentse; nakutenepo wanthu wentse an'zakutendani kufika lini nalini.