Nyimbo 41 - Bhukhu la Kuyamba

Kwanyakuyimbisa.

Nyimbo ya Dhaveti

¹ Niwakudala munthu aniyikhila nzelu kwawanthu wakushupika, Chawuta animupulusa panthawe yakushupika kwake.

² Chawuta animuchengeta achimulalamisa, achikhala ali bwino padziko, aniwalekelela lini kwaazondi wawo.

³ Chawuta animuthandiza panthawe yakuduwala kwake, achimuchita kuti akhale ntano pakuduwala kwake.

⁴ Koma ine ndidati, “Chawuta ndikomeleni ntima, ndipoleseni, pakuti ndidakutazilani!”

⁵ Azondi wangu anilewa-lewa nachizondo nabzangu adati: “Ko anifa lini kuti dzina lake linyangalike?”

⁶ Wentse am'bwela kuzandiwona anilewa mafala yapezi, pomwe mumitima yawo achikumbuka bzakuyipa, akayenda kunja aniyenda kabziwilikiza.

⁷ Wentse anin'zonda aniyenda achilewa kachete-chete nabzangu, ampangana kushupika kwangu.

⁸ Aniti, “Chinthu chin'cheneka chamufikila, an'chila lini pomwe.”

⁹ Ne shamwali yangu, yanin'themba, anidya chakudya changu, wandisandukila.

¹⁰ Koma imwe Chawuta ndikomeleni ntima, mundisumuse, pomwe kuti ndiwabwezelembo.

¹¹ Mukatenepo nin'zadziwa kuti munkondwa nayine, pakuti azondi wangu alibe kundikulila.

¹² Muninthandiza mukukwana kwangu, mundiyikhe patsogolo panu kwalini nalini.

¹³ Ngaadalisiwe Chawuta, Mulungu wa Izraeli, kuchoka lini nalini kufika lini nalini! Ameni! Ameni!