Nyimbo 4 - Bhukhu la Kuyamba

Kwanyakuyimbisa nabhanjo. Nyimbo ya Dhaveti

¹ Panin'chemela ndidayileni Mulungu wakulungama kwangu, mudanditsudzula pandikhadabzanthiwa. Ndikomeleni ntima mubvembo pemphelo langu.

² Imwe wanthu munfika lini muchichosa ulemo wangu muchindinyoza? Mufika lini muchifuna mafala yapezi-pezi, muchipsaga magunkha? Selah

³ Dziwani kuti Chawuta wabzipatulila wanthu wakudziwa-Mulungu, Chawuta anibva paninilila kwayiye.

⁴ Imwe wanthu kalipani, koma lekani kutaza, kumbukani mumitima yanu muli pakugonela panu, mukhale chete. Selah.

⁵ Pelekani ntsembe zakulungama, muthembe Chawuta.

⁶ Kuna azinji aniti, “Mbani angatiwoneseko bzabwino? Wonesani ntsisi zanu kwayise Chawuta!”

⁷ Imwe mwayikha kukondwa kukulu muntima mwangu, kuposa paankolola mphunga izinji navinyu inyowani.

⁸ Nin'gona mun'delekho, pakuti imwe Chawuta ndimwe mun'chita kuti ndikhale mwakuchinjilizika.