Nyimbo 38 - Bhukhu la Kuyamba

Nyimbo ya Dhaveti, yampfupo yankhumbusila

¹ Chawuta lekani kunditsimula muwukali wanu, panango kundilanga mudaphsa ntima.

² Pakuti misewe yanu yanyula mwayine, janja lanu labwela payine.

³ Munyama zangu mulibe kukwana, nathangwe lankwiyo wanu; mulibe n'delekho m'mabondo yangu, thangwe latazo langu.

⁴ Pakuti bzakuyipa bzangu bzandikulila, bzandilemela ninga ntolo wanintaza kutakula.

⁵ Bzilonda bzangu bzaakuwola, bzaakununkha, nathangwe lawulombe wangu.

⁶ Ndagwojodokelatu, ndaneta, ntsiku yentse ninfamba ndichilila.

⁷ Nkati mwangu muna moto, munyama yangu mulibe kukwana.

⁸ Ndamalilatu basa, ndapwetekeka. Nin'buwula nathangwe lakukula kwabzakuyipa bzangu.

⁹ Mfumu bzaninfuna bzentse bzili patsogolo panu, kuyankha mwawu kwangu kulibe kubisika kwayimwe.

¹⁰ Ntima wangu ukumenya, mphamvu zangu zandithawa, mwenje wamaso yangu palibe.

¹¹ Awo aninfuna nashamwali zangu achoka pana ine, abale wangu aniyima kutali.

¹² Awo ampsaga umoyo wangu, anteya ukhukha wawo, pomwe anilinga kundipweteka anilewa bzakucheneka, achikumbuka chinyengo ntsiku yentse.

¹³ Koma ine ndawa ninga kambulamakutu, nim'bva lini; ninga chimumumu chintaza kufungula mulomo.

¹⁴ Yinde, ndawa ninga munthu ansaya kubva, uyo ana nkamwa mulibe malewa-lewa.

¹⁵ Koma kwayimwe Chawuta, nin'dikhila, imwe, Mfumu wangu, Mulungu wangu mun'zandidayila!

¹⁶ Pakuti ninilewa, “Lekani kuti akondwe payine, awo am'bzikuza nzayo zangu pan'zitelela!”

¹⁷ Pakuti ndaa pafupi kukhukhumudwa, pomwe kuwawiwa kwangu kuli patsogolo pangu nthawe zentse.

¹⁸ Niniwulula bzakuyipa bzangu, ndashupika nakutaza kwangu.

¹⁹ Azondi wangu niwamphamvu, pomwe mbaazinji, anin'zonda palibe mulandu.

²⁰ Pomwe anim'bwezela chakuyipa pachabwino, anin'zondi pakuti ninteyela bzabwino.

²¹ Lekani kunditaya, imwe Chawuta! Imwe Mulungu wangu, lekani kukhala kutali nayine!

²² Kulumizani kuzandithandiza, imwe Mfumu yachipulumuso changu!