Nyimbo 37 - Bhukhu la Kuyamba

Nyimbo ya Dhaveti

¹ Leka kushupika nathangwe lawanthu wakuyipa, leka kusilila awo an'chita bzakuyipa.

² Pakuti tsapanopa an'zawuma ninga upsa, an'zafota ninga masamba mawisi.

³ Themba na Chawuta, uchite bzabwino, khala padziko, chita ushamwali nakukhulupilika.

⁴ Kondwa mwa Chawuta, pomwe an'zakupasa bzinfuna ntima wako.

⁵ Peleka njila zako kwa Chawuta, themba nayiye, iye an'zachita.

⁶ An'zabulisa padecha kulungama kwako ninga mwenje, nawutongi wako ninga masikati.

⁷ Khala chete, mwakudelekha pamaso pa Chawuta, leka kubzishupa nawuyo ansumukila munjila zake, nawuyo an'chita bzakuyipa.

⁸ Leka kuchita ukali, lekelatu nkhanza, leka kubzishupa, kunkufikisa kuchakuyipa.

⁹ Pakuti wakuyipa wentse an'zagwatiwa, koma awo an'dikhila Chawuta, an'zatola dziko.

¹⁰ Pakuti pakamphindi kang'ono-ng'ono, wakuyipa an'zakhala palibe, ne mukazanyanganisisa pambuto yake, an'zawapo lini.

¹¹ Awo am'bzichepesa an'zatola dziko, achizakondwa mun'delekho uzinji.

¹² Wakuyipa ankumbukila bzakuyipa wakulungama achimukukutila mano yake kwayiwe.

¹³ Koma Mfumu anseka munthu wakuyipa, pakuti aniwona kuti ntsiku zake zili kubwela.

¹⁴ Awo wakuyipa ampsolomola bhemba, achikombamisa utati wawo, kuti agwese wakushupika naansaya, kuti aphe awo wakukonkholoka,

¹⁵ bhemba lawo lin'zalasa mitima yawo, mawutati yawo yan'zatyoka.

¹⁶ Bzing'ono bzina wakulungama m'bzabwinoko, kuposa bzizinji bzina munthu wakuyipa.

¹⁷ Pakuti manja yawakuyipa yan'zatyoka, koma Chawuta an'zachengeta awo wakulungama.

¹⁸ Chawuta an'dziwa ntsiku zawakukwana, pomwe nthaka yawo in'zakhala kwalini nalini.

¹⁹ An'nyazisiwa lini munthawe zakuyipa, muntsiku zanjala yadziko an'khuta.

²⁰ Koma wakuyipa ampululuka, azondi wa Chawuta an'chita ninga kukomedza kwamwakudyesela bzifuwo, an'nyangalika ninga utsi, an'nyangalika.

²¹ Wakuyipa ankweleta koma am'bwezela lini, koma wakulungama adachena moyo pomwe ampeleka.

²² Pakuti wakudalisiwa an'zatola dziko, koma wakutembelelewa nayiye an'zagwatiwa.

²³ Kufamba kwamunthu kun'khazikisiwa na Chawuta, an'kondwa munjila yake,

²⁴ ne akagwa, an'gwelatu lini, pakuti Chawuta ndiye am'phata janja lake.

²⁵ Ndikhali mung'ono, koma tsapano ndakalamba, koma ndinati ndawona wakulungama achitayiwa, panango wana wake kukumbila chakudya.

²⁶ Ntsiku yentse niwakuchena moyo, pomwe achikweletesa, pomwe wana wake an'khala daliso.

²⁷ Choka pachakuyipa, uchite bzabwino, pomwe un'zakhala kufika lini nalini.

²⁸ Pakuti Chawuta anfuna kulinganiza, an'zataya lini wakukhulupilika wake. Wakukhulupilika wake an'zachengetewa kufika lini nalini, koma wana wawakuyipa an'zagwatiwa.

²⁹ Wakulungama an'zatola dziko, an'zakhalamo kufika lini nalini.

³⁰ Mulomo wawakulungama unilewa nzelu, lilimi lake linilewa bzakulinganiza.

³¹ Ntemo wa Mulungu wake uli muntima mwake, nzayo zake zintelela lini.

³² Wakuyipa an'nyangana wakulungama, achifuna kumupha.

³³ Chawuta an'zamutaya lini, m'manja mwake, panango kumulekelela achiwonewa mulandu, akabwelesewa kudale.

³⁴ Dikhila Chawuta, pomwe phata njila zake, pomwe iye an'zakusumusa uchitola dziko, iwe un'zawona kugwatiwa kwawakuyipa.

³⁵ Ndidawona munthu wakuyipa, wadima wankundo ninga muti wamusidhari waku Lebhanoni.

³⁶ Pandidapitapo pomwe ndidawona palibe iye, ne ndidamupsaga, koma ndilibe kumuwona.

³⁷ Nyangana munthu wakukwana, wona wakukonkholoka, tsogolo lamunthu umweyo lina n'delekho.

³⁸ Koma wakutaza an'zachenekelewatu, tsogolo lawanthu wakuyipa lin'zagwatiwa.

³⁹ Chipulumuso chawakulungama chin'choka kwa Chawuta, iye ndiye pakubisala pawo munthawe yakushupika.

⁴⁰ Chawuta aniwathandiza achiwapulumusa, aniwapulumusa kuchoka kwawakuyipa, achiwapulumusa pakuti ampotela mwayiye.