Nyimbo 36 - Bhukhu la Kuyamba

Kwanyakuyimbisa.

Nyimbo ya Dhaveti, mulanda wa Chawuta

¹ Kutaza kwamunthu wakuyipa kuniti nkati mwantima wangu; kulibe kugopa Mulungu, pamaso pake.

² Pakuti am'bzinamiza pamaso pake adati, bzakuyipa bzake bzin'dziwika lini, pomwe bzin'zondewa lini.

³ Mafala yamulomo wake niyakuyipa nachinyengo, waleka kuchita bzanzelu nabzabwino.

⁴ Ankumbuka bzakuyipa ali pakugonela pake, am'bziyikha munjila ili lini bwino, anilamba lini chakuyipa.

⁵ Ntsisi zanu, imwe Chawuta zinfika nakudzulu kwentse, kukhulupilika kwanu kunfika kumitambo.

⁶ Chilungamo chanu chin'chita ninga mapili ya Mulungu, utongi wanu un'chita ninga boo lanyanja. Munthu nachilombo mun'chiza, imwe Chawuta.

⁷ Nkukoma tani kwantsisi zanu, imwe Mulungu! Wana wawanthu ampotela muthunzi wamaphaphilo yanu.

⁸ Anidya bzamafuta bzamunyumba mwanu, imwe muniwapasa kumwa kuchoka mukamadzi kanu kabzakukondwelesa.

⁹ Pakuti mwayimwe muna ntsantsa yawumoyo, mumwenje wanu tiniwona mwenje.

¹⁰ Pitilizani ntsisi zanu kwaawo ankudziwani, nachipulumuso chanu kwawakukonkholoka ntima.

¹¹ Lekani kulekelela nzayo yawakubzikuza ichindiponda, panango janja lawakuyipa kundizwengesa-zwengesa.

¹² Kumwepo ndiko kun'gwela wanthu an'chita bzakuyipa, an'thusiliwa pantsi achitaza kulamuka.