Nyimbo 35 - Bhukhu la Kuyamba

Nyimbo ya Dhaveti

¹ Shupanani, Chawuta naawo aninyanganana nayine, menyanani naawo am'menyana nayine!

² Takulani nchinjilizo nachakuvalilizisa chanu, sumukani muzandithandize!

³ Takulani dipa namondo, nyangananani naawo akunditeyela! Lewani kun'zimu wangu kuti, ndine chipulumuso chako.

⁴ Ngaanyazisiwe afumuliwe, awo ampsaga umoyo wangu! Ngaabwezewe azungayile, awo ankumbuka bzakuyipa kwayine!

⁵ Ngaachitiwe ninga mungu kumphepo, ngilozi ya Chawuta ichiwathamangisa!

⁶ Njila yawo ngayichite n'dima ichitelela, ngilozi ya Chawuta ichiwateyela!

⁷ Pakuti adanditeya nakombe wawo, palibe namulandu wentse; adachelela umoyo wangu dindi, palibe namulandu wentse.

⁸ Kuchenekeka ngakubwele kwayiwo mwakusaya kudziwa! Lekani kombe waadateya awamange iwo, lekani agwelemo mukuchenekeka.

⁹ Pamwepo n'zimu wangu un'zasekelelandwa mwa Chawuta, uchisekelela muchipulumuso chake.

¹⁰ Mabondo yangu yentse yan'zati, “Chawuta, mbani aninga imwe? Imwe mumpulumusa alibe mphamvu, kuchoka kwawuyo ana mphamvu kwene-kwene kuposa iye, pomwe alibe mphamvu naansaya, kuchoka kwaanimupambila!”

¹¹ Mboni zadima zinsumuka, zinin'bvunza bzinthu bzaninsaya kudziwa.

¹² Anim'bwezela bzakuyipa pabzabwino, ntima wangu ukuwawa.

¹³ Koma ine, iwo paakhaduwala, ndidabvala masakha, ndidabzichepesa nakubzinyima chakudya. Ndidapemphela ndidakotamisa nsolo pachifuwa,

¹⁴ kuchita ninga ndikulila shamwali yangu panango m'bale wangu. Ndidafamba ninga munthu akulila amayi wake, kwakukotama achilila.

¹⁵ Koma pakukhukhumudwa kwangu, adakochezana pabodzi achikondwa, adakochezana pabodzi adanyanganana nayine, wanthu wadima wandikhasaya kudziwa, adapitiliza kundicheneka.

¹⁶ Adandinyomba achindinyomba, achikukuta mano yawo kwayine.

¹⁷ Kufikila lini, imwe Mfumu, muchindonyangana? Ndipulumuseni pakundimenya kwawo, kuchoka kumphondolo.

¹⁸ Nin'zakutendani pakati pawanthu azinji, nkati mwagunyenye lawanthu nin'zakudumbizani.

¹⁹ Lekani kulekelela azondi wangu anin'zonda palibe milandu achikondwa payine, ngaaleke kutinya diso lawo, awo anin'zonda palibe milandu.

²⁰ Pakuti anilewa-lewa lini bzan'delekho, koma adanyanganana naawo wakunyamala mudziko, ankumbuka mafala yachinyengo.

²¹ Afungula milomo yawo adanyanganana nayine, iwo aniti, “Aha, aha! Maso yathu yabziwona!”

²² Imwe Chawuta mwabziwona, lekani kunyamala! Imwe Mfumu lekani kukhala kutali nayine!

²³ Palamukani, mulamuke mundiyimilile, nathangwe langu Mulungu wangu na Mfumu wangu!

²⁴ Ndilinganizeni Mulungu wangu, kuteyeza kulungama kwanu Chawuta Mulungu wangu, ngaaleke kukondwa payine.

²⁵ Ngaaleke kulewa mumitima yawo kuti, “Aha moyo wangu!” Ngaaleke kulewa kuti, “Tam'meza!”

²⁶ Ngaanyazisiwe, azungayilisiwiletu! Awo ankondwa nanthamu zangu, ngaabvadzikiwe manyazi pomwe afumuliwe! Awo am'bzikuza adanyanganana nayine.

²⁷ Lekani awo anfunambo chilungamo changu, akuwe asekelele pomwe akondwe alewe kuti, “Chawuta ninkulu nthawe zentse! Uyo ankondwa nan'delekho wamulanda wake.”

²⁸ Pamwepo lilimi langu lin'zalewa bzakulungama kwanu, nakudumbiziwa kwanu ntsiku yentse.