Nyimbo 34 - Bhukhu la Kuyamba

Nyimbo ya Dhaveti, paadanamizila nsala patsogolo pa Abhimeleki, kuti amuthamangise, nakutenepo adamuthamangisa iye nkuyenda

¹ Nin'zadalisa Chawuta nthawe zentse, kudumbiziwa kwake kun'zakhala pamulomo wangu nthawe zentse.

² N'zimu wangu un'zasamwa mwa Chawuta, lekani amphayi abve, akondwe!

³ Ngatikuzeni Chawuta pabodzi nayine, bwelani tisumuse dzina lake pabodzi!

⁴ Ndidapsaga Chawuta, iye nkundidayila, adandipulumusa kubzinthu bzentse bzinin'gopsa.

⁵ Nyanganani kwayiye muwonekele, kuti nkhope zanu zileke kuchita manyazi,

⁶ Uyu munthu mphayi adachemelela pomwe Chawuta adabva, achimuchiza mukushupika kwake kwentse.

⁷ Ngilozi ya Chawuta in'zungunuka awo animugopa, ichiwapulumusa.

⁸ Layidzani muwone kuti Chawuta niwabwino! Niwakudala munthu an'thawila kwayiye.

⁹ Gopani Chawuta, imwe wakuyela wake, pakuti awo animugopa palibe chaansaya.

¹⁰ Wana wamphondolo ansaya, achibva njala, koma wentse ampsaga Chawuta ansaya lini bzentse bzabwino.

¹¹ Bwelani, imwe wana mutetekele kwayine, ninkufundisani kugopa Chawuta.

¹² Nimunthu mponi anfuna umoyo, anfuna kukhala ntsiku zizinji kuti awone bzabwino?

¹³ Bweza lilimi lako mubzakuyipa, namilomo yako kulewa chinyengo.

¹⁴ Choka pachakuyipa uchite bzabwino, psaga n'delekho, uwuteyele.

¹⁵ Maso ya Chawuta yali pawakulungama, makutu yake yanibva kulila kwawo.

¹⁶ Nkhope ya Chawuta idanyanganana naan'chita bzakuyipa, kuti agwate nkhumbusila yawo padziko.

¹⁷ Wakulungama akalilila thandizo Chawuta anibva, achiwapulumusa mukushupika kwawo kwentse.

¹⁸ Chawuta ali pafupi naawo wakusweka ntima an'chiza wakutaya ntima.

¹⁹ N'zizinji nthamu zawanthu wakulungama, koma Chawuta aniwachiza mubzentse.

²⁰ An'chengeta mabondo yake yentse, palibe ne libodzi lokha lintyolewa.

²¹ Chakuyipa chin'zapha wakuyipa, pomwe wentse an'zonda wakulungama an'zapasiwa milandu.

²² Chawuta anilombola umoyo waalanda wake, pomwe palibe ampotela kwayiye an'zapasiwa mulandu.