Nyimbo 32 - Bhukhu la Kuyamba

Nyimbo ya Dhaveti

¹ Niwakudalisiwa munthu anilekelelewa kutaza kwake, bzakuyipa bzake bzidagwaniliwa.

² Niwakudala munthu ansaya kukumbukiliwa bzakuyipa bzake na Chawuta, alibe chakuyipa muntima mwake.

³ Pakuti ndidakhala chete, mabondo yangu yafoka, nakulila nanyathwa ntsiku yentse.

⁴ Pakuti Chawuta usiku namasikati, janja lanu lidandilemela, mphamvu zangu zidamala, ninga kumaliwa nakuphsa kwadzuwa. Selah.

⁵ Ndidawonesa bzakuyipa bzangu kwayimwe, ndilibe kubisa kuyipa kwangu kwayimwe. Ndidati, “Ndiniwulula kutaza kwangu kwentse kwayimwe Chawuta”, imwe mudandilekelela bzakuyipa bzangu. Selah.

⁶ Nakutenepo lekani munthu wentse wakukhulupilila, apemphele kwayimwe, kuti panthawe yanyathwa, madzi yagumbula yaleke kumufikila.

⁷ Imwe ndimwe mbuto yangu yakubisalila, muninjinjiliza mukushupika kwangu; imwe mudandizungunuka nachipulumuso. Selah.

⁸ Nin'zakuwonesa ndichikufundisa njila yawun'zafamba nayo, nin'zafundisa, diso langu lin'zawa payiwe.

⁹ Leka kuchita ninga hachi panango nyulusi, bzinsaya kubvesesesa, bzin'chita kuyikhiwa chakumulomo kuti bzikhale pafupi, bzikasaya kuchitiwa tenepo bzin'khala lini pafupi nayiwe.

¹⁰ Kuna nthamu zizinji kwawanthu wakuyipa, koma ntsisi zin'zungunuka an'themba na Chawuta.

¹¹ Kondwani mwa Chawuta musekelele imwe mwentse wakulungama, pomwe chemelelani nakukondwa imwe mwentse wantima wakukonkholoka.