Nyimbo 31 - Bhukhu la Kuyamba

Kwakuyimbisa. Nyimbo ya Dhaveti.

¹ Mwayimwe Chawuta, nimpotela! Lekani kuchita kuti ndinyale. Mukulungama kwanu, ndipulumuseni!

² Teyani khutu lanu kamangu kwayine, ndichizeni! Khalani mwala wakupotela nanyumba yakuthawila kuti mundichize.

³ Pakuti ndimwe pakuthawila pangu, mwala napakubisala pangu, nathangwe ladzina lanu, ndiwoneseni pomwe nditsogoleleni.

⁴ Mun'zandichosa muwukonde waadanditeya, pakuti imwe ndimwe mbuto yangu yakupotela.

⁵ M'manja mwanu, niniyikha n'zimu wangu, mudandilombola imwe Chawuta, Mulungu wakukhulupilika.

⁶ Nin'zonda, awo aniyikha nzelu kubzinthu bzapezi-pezi, koma ine nin'themba na Chawuta.

⁷ Ninsekelela pomwe ninkondwa muntsisi zanu, pakuti imwe mudawona kudzudzika kwangu, mudadziwa kushupika kwan'zimu wangu.

⁸ Mulibe kundiyikha m'manja mwan'zondi wangu, mudachita kuti minyendo yangu iyime pambuto yakutambalala.

⁹ Ndikomeleni ntima Chawuta, pakuti ndili panyathwa, diso langu lafoka, pomwe n'zimu wangu nathupi langu.

¹⁰ Pakuti umoyo wangu namagole yangu bzamala nakubuwula, mphamvu zangu zamala nabzakuyipa bzangu, mabondo yangu yafoka.

¹¹ Ndakhala wakunyozeka kwene-kwene kwaazondi wangu, nakwawentse wanin'khala nawo, pomwe wakugopsa wanthu anin'dziwa, awo aniniwona munjila anin'thawa.

¹² Ndayebwewa kuchita ninga munthu adachoka munzelu zawanthu, ndakhala ninga n'tsuko wakuphwanyika.

¹³ Pakuti ndikubva azinji achindifudza kachete-chete, mantha yandizungunuka. Wentse pabodzi ampangana bzakundipha.

¹⁴ Koma ine nin'themba imwe, Chawuta, ndiniti, “Ndimwe Mulungu wangu.”

¹⁵ M'manja mwanu, ndimo muna nthawe zanu, ndipulumuseni kuchoka m'manja mwaazondi wangu, pomwe naawo anin'thamangisa!

¹⁶ Nkhope yanu ngayiwinikile mulanda wanu, ndichizeni nantsisi zanu.

¹⁷ Nin'zanyala lini, imwe Chawuta, pakuti nin'chemela kwayimwe. Wakuyipa ngaanyala, anyamaliziwe mpaka kumbuto yawanthu wakufa.

¹⁸ Lekani milomo inilewa magunkha inyamaliziwe, wentse anilewa bzakuyipa padzulu pawakulungama, nakubzikuza nakuchepsa.

¹⁹ Nkuwanda tani kwakukoma kwanu, kwamudachengetela awo ankugopani! Pomwe kwamudachitila awo ampotela mwayimwe, patsogolo pawanthu.

²⁰ Mun'zaabisa pambuto yakubisalila patsogolo panu, kuchoka paampangana wanthu mun'zaabisa, muchakubzigwanila, kutali nawanthu wamalilimi yakuyipa.

²¹ Ngaadalisiwe Chawuta, pakuti adachita kuti ntsisi zake zindidabwise, pandikhadachitiwa ninga guta lakuzungunukiwa.

²² Koma ine, pakukulumiza kwangu, ndidati, “Ndachosewa patsogolo panu.” Koma imwe mudabva pemphelo lakuti mundikomele ntima, pandidalilila kwayimwe.

²³ Funani Chawuta imwe mwentse wakukhulupilika, Chawuta an'chinjiliza wakukhulupilila, anilanga kwene-kwene wentse am'bzikuza.

²⁴ Limbani wonesani mphamvu zanu, imwe mwentse mun'dikhila Chawuta.