Nyimbo 30 - Bhukhu la Kuyamba

Nyimbo yapemphelo lakutenda

Nyimbo ya Dhaveti. Nyimbo yakupelekewa kwa Tembele.

¹ Ninkukuzani Chawuta pakuti mudandichiza, pomwe mulibe kuleka azondi wangu achisekelela.

² Chawuta, Mulungu wangu! Ndidalilila thandizo kwayimwe mudandipozeka.

³ Chawuta mudachosa n'zimu wangu kumbuto yawanthu wakufa, mudandichitisa kuti ndileke kuyenda kumbuto yawanthu wakufa.

⁴ Imbani nyimbo zakudumbiza Chawuta, imwe mwentse wanthu wake wakukhulupilika, pomwe pelekani kutenda pakukumbukila kuyela kwake.

⁵ Pakuti ukali wake niwakamphindi, koma kukoma ntima kwake nkwalini nalini. Kulila kum'bwela usiku, kusekelela kum'bwela machibese.

⁶ Mukusumukila kwangu ndidati, “Nin'zatekenyeka lini.”

⁷ Nakukoma ntima kwanu imwe Chawuta, mudandikonza kundichita ninga phili lakulimba. Mudabisa nkhope yanu, ndidabva mantha kwene-kwene.

⁸ Kwayimwe Chawuta, nin'zachemela! Kwayimwe Mfumu nin'zapsaga kukoma ntima kwanu.

⁹ Niphindu lanyi kuyenda kwangu kudindi? Ko dongo lingakutendeni? Ko lingazalewe bzakukhulupilika kwanu?

¹⁰ Ibvani Chawuta, ndikomeleni ntima! Khalani n'thandizi wangu Chawuta!

¹¹ Mudasandula kulila kwangu kuchikhala kubvina, mudatsudzula bzakubvala bzangu bzamasakha, muchindibvadzika kukondwa.

¹² Kuti ndemela ikuyimbileni ichikudumbizani, ileke kunyamala, ninkutendani kufika lini nalini, imwe Chawuta Mulungu wangu.