Nyimbo 28 - Bhukhu la Kuyamba

Kwa Dhaveti

¹ Kwayimwe Chawuta, nin'chemela! Mwala wangu, lekani kufunga makutu yanu, pakuti mukandinyamalila, nin'zachita ninga wale aniyenda kudindi.

² Ibvani fala lakupemphela kwangu, paninilila thandizo kuchoka kwayimwe, paninsumusila manja yangu kumbuto yanu yakuyelesesa.

³ Lekani kundikwekwetela pabodzi nawakuyipa, naawo am'phata basa lakuyipa; awo anilewa-lewa mafala yan'delekho kwawan'khalisana nawo, koma mitima ichilewa bzakuyipa.

⁴ Apaseni kuteyeza mabasa yawo, kuteyeza kuyipa kwabzakuyipa bzawo, kuteyeza mabasa yamanja yawo, apaseni, abwezeleni kutaza kwawo!

⁵ Pakuti achakumbuka lini mabasa ya Chawuta, namabasa yamanja yake. An'zaang'amba, an'zaamanga lini pomwe.

⁶ Ngaadalisiwe Chawuta! Pakuti adabva fala lakulila kwangu.

⁷ Chawuta mphamvu zangu, nanchinjilizo yangu, mwayimwe ntima wangu un'themba. Ndidathandiziwa, ntima wangu unkuziwa, kuchoka munyimbo yangu, nimpeleka kutenda kwayiye.

⁸ Chawuta nimphamvu kwayiye, mbuto yakuthawila wakudzodzewa wake.

⁹ Chizani wanthu wanu, mudalise nthaka yanu, abuseni, muwatakule kufika lini nalini.