Nyimbo 21 - Bhukhu la Kuyamba

Kwanyakuyimbisa.

Nyimbo ya Dhaveti

¹ Mumphamvu zanu Chawuta, ndimo mwaankondwa mambo, muchipulumuso chanu ndimo mwaankondwa kwene-kwene!

² Bzikhafuna ntima wake mudampasa, bzaakhakumbila namulomo wake mulibe kumunyima. Selah.

³ Mudagumana naye namadaliso yabwino, muchibvadzika pansolo wake ngundu yabwino yagolidhe chayiyo,

⁴ Adakumbila umoyo kwayimwe, muchimpasa, ntsiku zizinji zakulalama kufika lini nalini.

⁵ Kulemekezeka kwake nkukulu kwene-kwene nathangwe lakukunda kwanu, ndemela nawukulu mudabziyikha payiye.

⁶ Pakuti mudapeleka madaliso yanu kufika lini nalini, mun'chita kuti akondwe achisekelela nakuwapo kwanu.

⁷ Pakuti mambo uyo, an'themba na Chawuta, namuntsisi za Nyakudzulu-dzulu, antekenyesewa lini.

⁸ Janja lanu lin'zaphata ankuzondani wentse, janja lanu ladidi lin'zaphata wentse ankuzondani.

⁹ Mun'zaachita ninga wovoni yakutentha, pamun'zawoneka. Chawuta an'zaameza nawukali wake, moto un'zaamala.

¹⁰ Mun'zacheneka wana wawo wentse padziko, wana wawo kuchoka nkati mwawana wawanthu.

¹¹ Ne akapangana kukuchitilani bzakuyipa, bzakuyipa bzawobzo bzaaninga apangana bzin'chitika lini.

¹² Pakuti mun'zaathamangisa, mudalata nkhope zawo nawutati wanu.

¹³ Kuziwani Chawuta, mumphamvu zanu, tin'zayimba tichidumbiza kulimba kwanu.