Nyimbo 18 - Bhukhu la Kuyamba

Kwanyakuyimbisa. Nyimbo ya Dhaveti mulanda wa Chawuta, uyo adalewa mafala yanyimbo imweyi kwa Chawuta pantsiku Chawuta paadamupulumusa kuchoka m'manja mwaazondi wake wentse, nakujanja la Saulo. Iye adati:

¹ Ninfuna imwe Chawuta, mphamvu zangu!

² Chawuta ndiye mphako yangu, ndiye pakuthawila pangu, ndiye animpulumusa, Mulungu wangu, mwala wangu kwanimpotela, nchinjilizo yangu, nyanga yachipulumuso changu, pakubisala pangu.

³ Nin'chemelela kwa Chawuta uyo anfunika kudumbiziwa, anin'chiza kwaazondi wangu.

⁴ Bzingwe bzayimpfa bzidandizungunuka, mikukumo yamikulo yapezi-pezi yandizungunuka.

⁵ Bzingwe bzakumbuto yawanthu wakufa bzandizungunuka, miteyo yakumanda yandifikila.

⁶ Munthawe yandikhali panyathwa ndidachemelela kwa Chawuta, ndidalila kwa Mulungu wangu kuti andithandize. Iye adabva fala langu ali mu tembele yake, kulila kwangu patsogolo pake kudafika m'makutu mwake.

⁷ Dziko lidatetemela likatekenyeka, tsinde lamapili lidatetemela, lidatetemela lichizunguzika uku nawuku pakuti Mulungu akhadakalipa.

⁸ Utsi udalothoka m'mphuno zake, moto wakucheneka udachoka nkamwa mwake, masimbe yakhachokela kwayiye yakhatentha.

⁹ Adafungula dzulu achibuluka, pantsi paminyendo yake pakhana n'dima upsipa.

¹⁰ Adakwila pa Kherubhi achimbululuka, ali pamapapilo yamphepo adabuluka.

¹¹ Adachita n'dima kukhala chakufunika chake, chakubzigwanila nacho, ntambo wamvula upsipa.

¹² Kupenya kukhali patsogolo pake, m'mitambo yakupsipa mudachoka matalala namasimbe yamoto.

¹³ Chawuta adalilima kudzulu, Nyakudzulu-dzulu wawongota, matalala namasimbe yamoto.

¹⁴ Adathusa misewe achiwamwaza, adathusa mpheni, achiwavilinga.

¹⁵ Migelo yanyanja idawoneka, matsinde yadziko yasala padecha, nakutsimula kwanu Chawuta, namphepo in'choka mumphuno mwanu.

¹⁶ Adafika achichokela kudzulu achinditakula, adandinula m'madzi mazinji.

¹⁷ Adandipulumusa kwaazondi wangu wam'phambvu. Pakuti akhana mphamvu kupita ine.

¹⁸ Pandikhashupika adandifikila, koma Chawuta adanditsigila.

¹⁹ Adandichosa mungozi, adandipulumusa pakuti akhandifuna.

²⁰ Chawuta adandipagali kuteyeza kulungama kwangu, kuteyeza kuchena kwamanja yangu adandipagali.

²¹ Ndidateyeza njila za Chawuta, ndilibe kuchita chakuyipa chakusiya Mulungu.

²² Pakuti kutonga kwake ndiko kukhanditsogolela. Malango yake ndilibe kuyitaya.

²³ Ndilibe chakuyipa nayiye, ndilibe mulandu ne chakuyipa.

²⁴ Nakutenepo Chawuta adandipagali kuteyeza kulungama kwangu, kuteyeza kuchena kwamanja yangu patsogolo pake.

²⁵ Kwamunthu wakukhulupilika muniwonesa chikhulupililo chanu, kwamunthu alibe katsa am'bziwonesa.

²⁶ Kwamunthu am'bzichenesa niniwonesa kuchena, kwamunthu maluku nim'bziwonesambo ninga maluku.

²⁷ Mumpulumusa awo am'bzichepesa, am'bzikuza muniwabweza pantsi.

²⁸ Pakuti imwe Chawuta ndimwe muniniwinikila, Chawuta Mulungu wangu muniniwinikila mun'dima.

²⁹ Pakuti nayimwe ninkwanisa kuphwanya azondi wangu, nayimwe Mulungu ninkwanisa kumoga mpanda.

³⁰ Mulungu njila zake n'zakukonkholoka! Mafala ya Chawuta yalibe katsa, ninchinjilizo kwawentse ampotela mwayiye.

³¹ Mbani munango Mulungu kunja kwa Chawuta? Mwala mbani kunja kwa Mulungu wathu?

³² Mulungu adandibvadzika mphamvu, adachita kuti njila yangu ikonkholoke.

³³ Minyendo yangu aniyichita ninga bawala, munin'tsigila pakuyima m'mapili.

³⁴ Anfundisa manja yangu kumenya nkhondo, manja yangu yankwanisa kuthamula utati wankuwa.

³⁵ Mulungu mudandipasa nchinjilizo yachipulumuso chanu, janja lanu ladidi lidanditsigila, kupfatsa kwanu kudandichita kuti ndichite nkulu.

³⁶ Mudakuza njila yangu, minyendo yangu ilibe kutelela.

³⁷ Nin'zalonda azondi wangu, nin'zaaphata, nin'zabwelela lini kumbuyo kufikila ndaamaliza.

³⁸ Nin'zaaphwanya-phwanya bzakuti an'zakwanisa lini kusumuka, an'zagwela pantsi panzayo zangu.

³⁹ Mudandibvadzika mphamvu zakumenya nkhondo, nimpondeza wentse anim'mukila.

⁴⁰ Mudachita kuti azondi wangu athawe, ndidachenekelatu wentse akhandizonda.

⁴¹ Adalilila thandizo, koma pakhalibe wakundichiza. Adalilila Chawuta, koma alibe kuwadayila.

⁴² Ndidaapeya-peya ninga pfumbi patsogolo pachonzi, ndidaataya ninga dongo munjila.

⁴³ Mudandipulumusa kwawanthu wamudasankhula padzulu pangu, muchindichita ntongi wamadziko, wanthu wadziko nin'dziwa lini alibe kunditumikila.

⁴⁴ Paadabva nabzangu adanditetelela, wana wawachilendo adandinamatila.

⁴⁵ Wana waalendo anfota achitetemela, pam'bula mumbuto zawo zakuthawila.

⁴⁶ Chawuta wamoyo, wakudalisiwa, mwala wangu! Ngaakuziwe Mulungu wachipulumuso changu!

⁴⁷ Mulungu am'bwezela, aniyikha madziko pantsi pangu;

⁴⁸ achindipulumusa kwaazondi wangu. Mudandisumusa kwaazondi wangu, mudandipulumusa kwamunthu wandewo.

⁴⁹ Nakutenepo ninkutendani Chawuta, pakati pamadziko, nin'zayimba ndichidumbiza dzina lanu,

⁵⁰ uyo ampeleka kukuziwa kwakukunda kwamambo wake, an'chitila ntsisi munthu waadadzodza, kwa Dhaveti nakum'badwe wake kufika lini nalini.