Nyimbo 17 - Bhukhu la Kuyamba

Pemphelo la Dhaveti

¹ Chawuta ibvani chilungamo! Tetekelani kulila kwangu! Ibvani pemphelo kuchokela kumilomo yakusaya kunama!

² Kutongewa kwangu kuchokele pamaso panu, maso yanu yawone kulungama.

³ Mwayesa ntima wangu, mwandifikila usiku, mwandiyesa, mulibe kuwona chakuyipa, ndakumbuka kuti mulomo wangu un'zalewa lini chakuyipa.

⁴ Nin'chita lini bzin'chitiwa naanango wanthu, nintetekela bzamunilewa, ndilibe kuteyela njila zawanthu wandewo.

⁵ Nthawe zentse nin'khala munjila zanu, nzayo zangu zintekenyeka lini.

⁶ Nin'chemela kwayimwe Mulungu pakuti mun'nidayila, nakutenepo teyani makutu yanu kwayine mutetekele mafala yangu.

⁷ Wonesani kudabwisa kwantsisi zanu, imwe mun'chiza wentse ampotela kwayimwe kujanja lanu ladidi, kuchoka kwaazondi wawo.

⁸ Ndichengeteni ninga kuchengeta kwamun'chita mboni yadiso lanu, mundibise mun'thunzi wamapapilo yanu,

⁹ kuchoka kwaazondi wangu anfuna kundipha; kwaanyakundizonda adandizungunuka.

¹⁰ Afungila ntsisi zawo, milomo yawo ina mafala yakubzikuza.

¹¹ Tsapano azungunuka kafambidwe kangu, atizungunuka, akupsaga njila yakundigwesela nayo pantsi.

¹² Akuchita ninga mphondolo ikupsaga chakung'amba, ninga mwana wamphondolo adabisalila.

¹³ Sumukani Chawuta muwafikile, muwakunde! Ndipulumuseni kwamunthu wakuyipa nabhemba lanu,

¹⁴ ndichinjilizeni Chawuta najanja lanu kwawanthu, wanthu ana chigawo chawo pano padziko lapantsi. An'dzadza mimba zawo nabzamudaachengetela pantsi pano, ana wana azinji, achichengetelambo mphwele zawo!

¹⁵ Koma ine nin'zawona nkhope yanu muchilungamo, panin'zalamuka nin'zakondwa nakuwoneka kwanu.