Nyimbo 16 - Bhukhu la Kuyamba

Pemphelo la Dhaveti lakusaya kugopa

¹ Mulungu ndichinjilizeni, pakuti ine nimpotela mwayimwe.

² Ine ninti kwa Chawuta, “Ndimwe Mfumu wangu, ndilibe chabwino kunja kwayimwe.”

³ Wanthu wakuyela awo ali mudziko, ana ukulu, wamphamvu, ntima wangu unkondwa nawo.

⁴ Awo am'bzisankhulila amilungu anango an'thimizila nthamu zawo. Nin'zapeleka lini ntsembe zakuthila gazi kwaamilungu wawo nin'zapembeza lini amilungu wawo namilomo wangu.

⁵ Chawuta ndiye chigawo chanthaka yangu, nakhomeshi yangu bzentse bzangu bzili m'manja mwanu.

⁶ Malile yanthaka yangu yagwa mumbuto zabwino, chadidi, ndina nthaka yabwino kwene-kwene!

⁷ Nin'dalisa Chawuta pakuti animpasa nzelu zabwino, ne panthawe yawusiku ntima wangu un'ninfundisa bzakuchita.

⁸ Ndayikha Chawuta patsogolo pangu nthawe zentse, pakuti ali kujanja langu ladidi nintekenyesewa lini.

⁹ Nakutenepo ntima wangu unkondwa, kukhala kwangu kwentse kukusekelela, nathupi langu lin'khala lakuchinjiliziwa.

¹⁰ Pakuti munintayilila lini kumbuto yawanthu wakufa, munilekelela lini wakukhuma muchikhupililo wanu achiyenda kawola.

¹¹ Munin'dziwisa njila yawumoyo, kukondwa kwachadidi kuli pamaso panu. Kujanja lanu ladidi kuna bzinthu bzabwino kufika lini nalini.