Nyimbo 148 - Bhukhu la KuyambaKudzulu napantsi ngakudumbize Mulungu 1 Aleluya! Dumbizani Chawuta kuchoka kudzulu, mudumbizeni kudzulu-dzulu! 2 Mudumbizeni, ngilozi zake zentse! Mudumbizeni, wankhondo wake wentse! 3 Mudumbizeni, dzuwa namwezi! Mudumbizeni nyenyezi zentse zamwenje! 4 Mudumbizeni, imwe kudzulu-dzulu! Pomwe imwe madzi yali padzulu pakudzulu! 5 Lekani bzidumbize dzina la Chawuta! Pakuti iye adalewa, ibzo bzidalengewa! 6 Adabzikhazikisa kufika lini nalini; adayikha lango labzene linsaya kumala. 7 Dumbizani Chawuta kuchoka padziko lapantsi! Imwe bzilombo bzamunyanja namaboo yentse; 8 moto, namatalala, namadzi yawufa, nafulele, chonzi chankhongolo kudzadzikiza bzaanilewa! 9 Mapili namitunthu yentse, miti yamichelo namisidhari yentse! 10 Bzilombo, nang'ombe zentse, bzinfamba namimba, nambalami zim'mbuluka! 11 Mazimambo yadziko lapantsi, nawanthu wentse, manduna naatongi wadziko lapantsi! 12 Alumbwana naatsikana pa bodzi, n'khalamba nawana ang'ono! 13 Lekani adumbize dzina la Chawuta, pakuti dzina lake lokha linkuziwa; ndemela yake ili padzulu padziko nakudzulu. 14 Adasumusa nyanga kwawanthu wake, dumbizo kwawantsisi wake wentse, kwawana wa Izraeli, wanthu pafupi naye. Aleluya! |
Bhaibheri reChikunda © Bible Society of Zimbabwe
Bible Society of Zimbabwe