Nyimbo 147 - Bhukhu la Kuyamba

Kudumbiza Mulungu wam'phamvu zentse

¹ Aleluya! Pakuti n'chabwino kuyimbila Mulungu wathu; pakuti n'chakukodwelesa, nyimbo yakudumbiza idamukomela.

² Chawuta am'manga Jerusalema, ankocheza wakutayiwa wa Izraeli.

³ Anilapa wakusweka ntima, achimanga bzilonda bzawo.

⁴ An'dziwa kuwanda kwanyenyezi, achipasa zentse madzina yazene.

⁵ Mfumu wathu ninkulu, pomwe ana mphamvu zizinji; kubvesesesa kwake kumpimika lini.

⁶ Chawuta ansumusa wakupondelelewa, am'phomolela pantsi wakuyipa.

⁷ Imbani kwa Chawuta muchimutenda! Imbani kwa Mulungu wathu nachipendani!

⁸ An'gwanila kudzulu namitambo, ankonza mvula yadziko lapantsi, an'chita kuti upsa umele m'mapili.

⁹ Ampasa bzilombo chakudya chabzene, nakwawana waankhungubwe anilila.

¹⁰ Ansekelela lini mumphamvu zahachi, panango kukomedzewa naminyendo yamunthu.

¹¹ Koma Chawuta ankomedzewa naawo animugopa, naawo an'nyanganila ntsisi zake.

¹² Kuza Chawuta, iwe Jerusalema! Dumbiza Mulungu wako, iwe Ziyoni!

¹³ Pakuti anilimbisa migwele yamisuwo yako, an'dalisa wana wako mwayiwe.

¹⁴ Aniyikha nkhalo m'malile yako; ankukhutisa natiligu yabwino kwene-kwene.

¹⁵ Antuma fala lake kudziko lapantsi, fala lake lin'thamanga mwakukulumiza.

¹⁶ Ampeleka madzi yawufa ninga usalu, am'mwaza zawe ninga dotha.

¹⁷ An'thusa matalala yake ninga bzigodo; mbani angalimbikile mphepo yake?

¹⁸ Antuma fala lake, achibzisungunula; an'chita kuti chonzi chake chikukume, madzi yachiyelela.

¹⁹ Anilewa fala lake kwa Jakobho, malango yake namitemo yake kwa Izraeli.

²⁰ Alibe kumbachitako tenepo kudziko linango, an'dziwa lini matongelo yake. Aleluya!